SuperDizionari

sclopâ v.intr.
(sclo-pâ)

Rompisi di bot, spec. cun violence e sunsûr, par vie de masse pression

sinonims

dâ un sclop, dâ un ton, molâ un ton, petâ un ton, rompi fûr, spreçâ, spreçâsi, trai

esemplis

"prime si à di fâ un taiut su la scusse [des cjastinis], par che no sclopin"

gjavât fûr di "Maman! 11-10-2019" di Arlef

"oh se il teremot / a fos dome la crosta da cjera / che a si môf / sutila ingrispada / pieluta sclapada / strâts che a si sbruntin / e si pochin / fintramai che a sclopin"

gjavât fûr di "La crosta da cjera..." di Leonardo Zanier

sclopâ v.intr.
(sclo-pâ)

Fâ une esplosion

sinonims

dâ un sclop, dâ un ton, esplodi, molâ un ton, petâ un ton, tonâ

esemplis

"parsore dai nestris cjâfs lis granadis a passavin ciulant rabiosis, lant a sclopâ abàs jù pai crets"

gjavât fûr di "Cemût che o soi restât caporâl" di Pieri Menis

"e sclopavin bombis dut ator, e là jù al jere dut un saetâ di flamis"

gjavât fûr di ""Nocent"" di Maria Forte

sclopâ v.intr.
(sclo-pâ)

Di cûr, bati plui fuart in cause di un grant sfuarç o di une emozion, di un dolôr, di un sintiment che no si rivin a sopuartâ (iperb.)

sinonims

dâ un sclop, dâ un ton, molâ un ton, petâ un ton, scampanotâ, scrocâ, scrocâ fûr, spreçâ, spreçâsi, trai

esemplis

"o volarès, jo, che tu vessis provât, cuant che i fîs a son malâts e che si scuen puartâ la sô cjar tal cimitieri, e il cûr al sclope!"

gjavât fûr di "La fie çuete" di Maria Forte

sclopâ v.intr.
(sclo-pâ)

Murî (iperb.)

sinonims

cracâ, dâ un sclop, dâ un ton, murî, molâ un ton, petâ un ton, scrocâ, scrocâ fûr, spreçâ, spreçâsi, crepâ, trai un ton

esemplis

""Linde, Linde… ce âstu fat, se no tu le finissis, jo o sclopi!" "Finissile tu, une volte… e sclope!""

gjavât fûr di "Barbane" di Pieri Somede dai Marcs

"Une volte tant amâsi, / propi amâsi di biel cûr: / e cumò nancje cjalâsi, / se si sclope, se si mûr!"

gjavât fûr di "Une volte tant amâsi" di Popolâr

sclopâ v.intr.
(sclo-pâ)

Sucedi o manifestâsi a colp, ancje in maniere fûr di control o violente (fig.)

sinonims

scrocâ, spreçâ, spreçâsi

esemplis

"la novitât e sclopà une dì che la Dele, tornade de buteghe, e contà ae parone che doi siôrs, mai viodûts, a vevin cjacarât robis di fâ balinâ il stomi"

gjavât fûr di "Cjase di Dalban" di Maria Forte

"cuant che e sclopà la vuere, cundut che al ves dîs fis e un so frut al fos za stât riclamât, al domandà di lâ sot, volontari"

gjavât fûr di "Vigji il vuardian" di Lucio Perès

"une dì, cuissà mai par ce reson, e sclopà une barufe tra i viei"

gjavât fûr di "Sot il puarti" di Pieri Menis

"pe campagne dulintor Tresesin a jerin sclopadis epidemiis curiosis tai nemâi"

gjavât fûr di "Come tai romançs" di Alan Brusini

sclopâ v.intr.
(sclo-pâ)

No stratignîsi, vê une manifestazion o une reazion no moderade (fig.)

sinonims

dâ sù, saltâ sù, scrocâ, scrocâ fûr, spreçâ, spreçâsi

esemplis

"e jere dome biele, e lu saveve tant, che dibot e sclopave di braùre"

gjavât fûr di "Lis predicjis dal muini" di Josef Marchet

"e sclopà di vaî a fuart come une scoreade"

gjavât fûr di "La aghe da pît la cleve" di Dino Virgili

"a fasevin, ducj i doi, muse dure, ma a pene fat un zîr a sclopavin di ridi"

gjavât fûr di "Doro" di Pieri Menis

"dopo un pôc, Rico al sclope: «Cale chel trê, mondo can! Ce spietistu?»"

gjavât fûr di "Mondo birbo" di Meni Ucel

sclopâ v.intr.
(sclo-pâ)

Jessi plen o straplen di alc, sedi materiâl che imateriâl, o ancje di int (fig.)

sinonims

jessi plen, spreçâsi

esemplis

"i Istitûts scolastics a sclopin di iscrits e a son in cantîr continuis ampliaments des struturis"

gjavât fûr di "EMAS: gnûf regolament european sul ambient" di Isidoro Zuliani

"[i componiments di Minut] a sclopin di realisim, cuant che a scrivin da vuera provada ta trinceis"

gjavât fûr di "La puisia gnova di Gjovanin Minut" di Ferruccio Tassin

monolengâl