SuperDizionari

scotâ v.tr.
(sco-tâ)

Fâ une lesion, soredut ae piel o a une part dal cuarp, par vie de temperadure une vore alte

sinonims

brusâ, sbrovâ

esemplis

"no son muarts, no! Chel zovin al jere su lis undis e trê cuarts par lâ. Un trâf in bore dal puiûl i veve colâti jù su la schene, lu à scotât tun mût, Diu nus judi!"

gjavât fûr di "No je plui vive" di Dolfo Zorzut

scotâ v.tr.
(sco-tâ)

Cuei a temperadure alte e par pôc timp, ancje in maniere incomplete, dome in mût di sigjilâ la superficie de robe di mangjâ

esemplis

"strissinâts de fam, subit fûr dal lager i internâts a jerin jentrâts tes coloniis a domandâ e gafâ cui un purcit, cui une gjaline, une raze, polam in sorte di trai il cuel, splumâ, scotâ in premure e parâ jù"

gjavât fûr di "Storie di Min" di Ivano Urli

"meti intune cite cjalde vueli e cuant che al è cjalt scotâ il poleç taiât a tocs e po gjavâlu e tignîlu in bande. Tal stes vueli scotâ i gjambars e po gjavâju e tignîju in bande"

gjavât fûr di "Mar i muntanya" di Sandri Carrozzo

scotâ v.tr.
(sco-tâ)

Tratâ un cualsisei materiâl cun temperadure alte e par pôc timp

esemplis

"al deventà un barbîr di fâ tremâ. / L'ere po bon di petenâ lis sioris, / di cuinçâ la piruche cu la code / bon di scotâ i cjavei cul tireboris"

gjavât fûr di "Lis gloriis di Tambûr" di Pieri Çorut

scotâ v.tr.
(sco-tâ)

Dâ une sensazion di cjalt une vore fuart (ancje ass.)

sinonims

brusâ, sbrovâ, boli

esemplis

""Ma cemût fasêso a disfredâ chê mignestre? E devi scotâ dal diaul." "Noaltris fruçonìn dentri un bocon di pan. Cussì po! A la buine di Diu""

gjavât fûr di "Sant Martin" di Luigi Gortani

"el soreli al scote. Si fermìn difûr, a ripâr de ombrenone"

gjavât fûr di "Viaç a Vignesie" di Arturo Feruglio

scotâ v.intr.
(sco-tâ)

Vê la temperadure une vore alte, soredut par vie de fiere o sim. (fig.)

sinonims

brusâ, ardi, boli

esemplis

"denant dai voi mi ven come une tele, mi scotin i timplis, no sai plui ce che fasi"

gjavât fûr di "Se la prime mi cjoleve" di Dolfo Zorzut

"Eliseo si tirà jù il cjapiel e si metè une man sul cerneli. Al scotave. L'om al veve pôre di cjapâ un colp di soreli"

gjavât fûr di "Prime di sere" di Carlo Sgorlon

scotâ v.tr., v.intr.
(sco-tâ)

Di cualsisei sintiment o sensazion che si puedi paragonâ cul fûc, fâsi sintî a fuart (fig.)

sinonims

brusâ, ardi, infogâ, inflamâ

esemplis

"zovenots di prin svol, che amôr us scote / induvinait mo ce che us puarte in dote / Minighine la biele del Friûl?"

gjavât fûr di "Il Strolic furlan par l'an 1824" di Pieri Çorut

scotâ v.tr.
(sco-tâ)

Causâ une sensazion di dolôr, delusion, umiliazion, emozion e v.i. (fig.)

sinonims

brusâ, sbrovâ, fâ mâl

esemplis

"il ros che i veve imboreçade la muse, al palesave trop che lis peraulis di jê lu vevin scotât"

gjavât fûr di "Îr e doman" di Gianni Gregoricchio

"a jerin ancje lis gnots cu lis pôris di simpri e il visâsi di Maliute, un visâsi che i scotave"

gjavât fûr di "La ultime partence" di Alan Brusini

scotâ v.intr.
(sco-tâ)

Jessi dûr, discomut o fintremai pericolôs di tignî, di fâ, di sopuartâ e v.i. (fig.)

sinonims

brusâ

esemplis

"il puar de Fazio al à scugnût stâ sentât sun chê cjadree che i scotave, massime dopo che il Procuradôr i veve sunât pal timp sîs dîs di preson e 51 francs di multe"

gjavât fûr di "Florean dal Palaç, I, 1" di Guido Antoniali

"i partesans a lavin a cjatâ i fassiscj in cjase par fâur paiâ lis lôr malefatis, [il podestât] al jere dut tun dafâ par cirî un che lu rimplaçàs ta chê sô incariche che e scotave ogni dì di plui"

gjavât fûr di "Il muc" di Roberto Ongaro

scotâ v.intr.
(sco-tâ)

Di argoment, notizie, novitât o sim., clamâ atenzion, fâ scjas, fâ scandul (fig.)

esemplis

"cualchidun al veve ancje vût cûr di dî: "Vevino di vê dome ben lôr?" … La invidie! … E intant la robe no si contignive plui e e scomençave a scotâ"

gjavât fûr di "Il tei" di Maria Forte

monolengâl