SuperDizionari

secjâ v.tr.
(se-cjâ)

Fâ deventâ sec, fâ pierdi umiditât

sinonims

incandî, incantesemâ, sidiâ, arsî, brusâ, brusinâ, candî, cantesemâ, suiâ

esemplis

"il cjalt di Avost al à secjade la arbe ta chel cimitieri bandonât disore Cividât"

gjavât fûr di "Poche! Mone" di Checo Tam

"e ducj a domandâi se e veve fat bon viaç in chê scjaldadice, in chel scotôr di Jugn che al secjave il polvar de strade"

gjavât fûr di "Cjase di Dalban" di Maria Forte

secjâ v.tr.
(se-cjâ)

Lassâ tal soreli, tal aiar o meti intal for robe di mangjâ o altris materiâi, e v.i., par che, pierdint la aghe, si puedi conservâju

esemplis

"secjâ i odôrs e lis jerbucis par fâ tisanis"

gjavât fûr di "Lis rosis tal plat" di Margherita Timeus

secjâ v.tr.
(se-cjâ)

Fâ pierdi, soredut svaporant, la aghe o il licuit di un bacin o di un contignidôr

sinonims

suiâ

esemplis

"Avost al suie torints e cjanâi, al secje olis e risultivis"

gjavât fûr di "Avost" di Mario Martinis

secjâ v.tr.
(se-cjâ)

Bevi svelt dut il contignût di un recipient, soredut vin o altri alcolic (fig.)

sinonims

svuedâ, disvuedâ, scolâ

esemplis

""[...] Ven cun me, Montàg, che la prime robe che i vuei imparâ a è la strade par rivâ tal Paveon 9, dulà che si struchin e secjin i miour impiestomi de citât!” "

gjavât fûr di "Kebar krossè" di Stiefin Morat

secjâ v.tr.
(se-cjâ)

Fâ pierdi vivôr (fig.)

esemplis

"il dolôr i veve secjât ta la anime chel afiet sclet di cuant che e jere frutate"

gjavât fûr di "Sul agâr" di Pieri Menis

secjâ v.tr., v.intr.
(se-cjâ)

Dâ fastidi

sinonims

rompi, stufâ, saceâ

esemplis

"o stoi su lis mês e no secji nissun"

gjavât fûr di "Maldicencis" di Meni Ucel

""Vuelial finîle? Che nol stei vignî a secjânus, che al vadi fûr…""

gjavât fûr di "Barbane" di Pieri Somede dai Marcs

"lis cjacaris sul gastalt i secjavin , no par nuie - ducj i gastalts e sgrifignin! - ma soredut par vie che ancje la plui basse servitût e jere vignude a cognossince de robe"

gjavât fûr di "La manie" di Arturo Feruglio

monolengâl