SuperDizionari

servizi s.m.
(ser-vi-zi)

Lavôr fat par un paron, in cundizion subordenade, in câs ancje in cundizion di pierdite de libertât

esemplis

"Citolini al dedicave une sô Grammatica de la lingua italiana manuscrite [...] al grant dignitari Hatton, di sigûr cu la sperance di jentrâ al so servizi"

gjavât fûr di "Il brevet" di Mario Turello

servizi s.m.
(ser-vi-zi)

Impegn totâl a pro di une persone, di une istituzion, di une cause, di un ideâl, e v.i.

esemplis

"Sant Ignazi di Loyola [...] si è metût anime e cuarp al servizi di Crist e de glesie, fondant la Compagnie di Jesù"

gjavât fûr di "Sant Jacum, là che al finìs il mont" di Antoni Beline

servizi s.m.
(ser-vi-zi)

Lavôr fat li di une dite publiche o privade

esemplis

"lis modalitâts di organizazion a son diferentis se il docent al è za in servizi te scuele [...] o se il docent al ven di fûr"

gjavât fûr di "Il furlan al è rivât tes nestris scuelis. Si met in vore il Regolament pal insegnament de marilenghe in regjon" di Patrizia Pavatti

servizi s.m.
(ser-vi-zi)

Tun ambient, ativitât che si fâs pai clients

esemplis

"ca fasino servizi ancje ai taulins o dome al banc?"

servizi s.m.
(ser-vi-zi)

At che al zove

sinonims

favôr, plasê

esemplis

"[Radio Onde Furlane] e fâs un grant servizi ae lenghe furlane, stant che e je la sole radio in lenghe furlane, e la sô cualitât gjornalistiche e linguistiche si juste cul passâ dal timp simpri di plui e simpri miôr"

gjavât fûr di "Memoriis di politiche linguistiche" di Adrian Cescje

servizi s.m.
(ser-vi-zi)

Prestazion furnide di un ent public o privât par sodisfà une dibisugne de coletivitât

esemplis

"intervignî cun plui determinazion e eficacie par garantî l'ûs des lenghis di minorance tai mieçs di comunicazion, cun riferiment particolâr al servizi radiotelevisîf public"

gjavât fûr di "La lenghe furlane tai mieçs di comunicazion" di Erika Adami

"l'iluminament [public] al jere procurât de flame dal vueli, e chest si lei intal rindicont economic di spese buride fûr dal furnidôr dal servizi"

gjavât fûr di "La invenzion dal vueit inte lampadine di Turo Malignani. Storie, gnovis ipotesis e atualitât" di Lorenzo Marcolini

"une des peraulis clâf dal turisim dal avignî e je la “cualitât” dai servizis a disposizion dai visitadôrs e de popolazion residente"

gjavât fûr di "Il rûl economic dal turisim in Italie" di Attilio Celant

servizi s.m.
(ser-vi-zi)

Division inte organizazion di une dite o di une istituzion

esemplis

"cu la leç regjonâl 15/1996 al ven metût in pîts, sot de “Direzion de Istruzion e de Culture”, il “Servizi pes lenghis regjonâls e minoritariis”"

gjavât fûr di "Relazion dal Grup di lavôr “Planificazion linguistiche”" di Donato Toffoli

servizi s.m.
(ser-vi-zi)

Complès di ogjets doprâts par une cierte robe, in particolâr par parecjâ la taule

esemplis

"arint, cristalarie, cuadris, stampis di valôr, servizis di porcelane, soremobii"

gjavât fûr di "Ombris tal infinît" di Carlo Sgorlon

servizi s.m.
(ser-vi-zi)

Articul, program, filmât, documentari o sim. suntun argoment specific

esemplis

"a son jessûts articui e servizis che a descrivevin particolârs che no son mai esistûts te realtât dai fats"

gjavât fûr di "Interviste a Amato De Monte" di Christian Romanin

servizi s.m.
(ser-vi-zi)

Tal pl., puest li che si va a fâ i bisugns, massime tun edifici public o tun ambient

sinonims

gabinet, necessari

esemplis

""Al vûl viodi i servizis? E parcè?" "Cussì" dissal Begot "O soi curiôs". [...] Nol jere tant ce viodi. Dut ce che si podeve dî al è che i gabinets a jerin nets"

gjavât fûr di "La rambe" di Fabian Ros

monolengâl