SuperDizionari

sfuarç s.m.

Implei di fuarce, o ancje di energjie, capacitâts, inteligjence, emotivitât e v.i., che al compuarte un impegn alt o un ciert impegn

sinonims

fadie, fature, impegn, maneç, smaneç, stracade, strussie, tibi, travai, vite, vore

esemplis

"i pescjadôrs che sot sere a tiravin lis rêts cuntun sfuarç misurât e compagn, che al rivave a vinci il mâr"

gjavât fûr di "Cjase di Dalban" di Maria Forte

"al varès vaît vulintîr, ma si stratignì fasint un sfuarç"

gjavât fûr di "Chei di Muraie" di Pieri Menis

"la Lanzine ur proferì il solit cafè neri. Nita e servì a ducj, cence cjalâ Turi in muse, che al faseve mil sfuarçs par che lu cjalàs"

gjavât fûr di "La aghe da pît la cleve" di Dino Virgili

"la slargjade dal ûs dal furlan e domande un sfuarç no nome politic ma ancje tecnic"

gjavât fûr di "La grafie furlane normalizade – Introduzion" di Xavier Lamuela

sfuarç s.m.

Moviment dai muscui e di cierts orghins, produsût di une reazion che e pues ancje jessi involontarie

esemplis

"lusignutis blancjis e neris, i sdanzavin denant dai voi… Di colp al sintì a rivâ un altri sfuarç di gomit"

gjavât fûr di "Tal ospedâl" di Amedeo Giacomini

sfuarç s.m.

[TS] (med.) Impegn fisic che al prodûs fadie, spec. pes funzions cardiorespiratoriis

esemplis

"tu masanis chilometris, fin cent e cincuante par setemane, fintremai che il cûr e lis gjambis a son usâts al sfuarç"

gjavât fûr di "Faliscjis" di Cristina Noacco

sfuarç s.m.

[TS] (fis.) Solecitazion esterne suntun solit, par esempli su di un element di une struture o sul toc di une machine

esemplis

"une idee plui clare de diference grandonone di compuartament mecanic des RPM par rapuart a lis maltis si gjave fûr dal diagram sfuarç/deformazion di une prove a flession"

gjavât fûr di "Maltis armadis pes struturis dal tierç mileni" di Alessandro Bachiorrini

sfuarç s.m.

[TS] (sport) Azion di scherme par parâ vie plui che al è pussibil la arme dal aversari de linie di atac

monolengâl