SuperDizionari

sgrisul s.m.
(sgri-sul)

Contrazion involontarie e ritmiche, pal solit pôc fuarte, dai muscui che e pues jessi causade dal frêt, de fiere o di une emozion, spec. de pôre

sinonims

trim, raze

esemplis

"al sintive i sgrisui jù pe schene, par vie dal sudôr che l'aiar i glaçave aduès"

gjavât fûr di "Prime di sere" di Carlo Sgorlon

"al restà par un biel toc cu la panze injù, travanât di sgrisui"

gjavât fûr di "Tal ospedâl" di Amedeo Giacomini

"cjapant la cjicare dal cafè des mans de Leni, i veve tocjât la sede de piel e si jere sintût a cjapà di un sgrisul, dai pîts ae lidrîs de cope"

gjavât fûr di "La tiere di Lansing" di Maria Forte

""O ven subit" i rispuint il fari [al diaul], che a viodii la code si jere sintût a cori i sgrisui pe vite"

gjavât fûr di "Meni Fari" di Luigi Gortani

Viôt ancje: grisul, ingrisul

sgrisul s.m.
(sgri-sul)

Emozion fuarte o che e somee che si produsi come une vibrazion (fig.)

sinonims

emozion, gole, sbisighin, smalit, trim

esemplis

"al è come se da fonts da la anime un sgrisul di salvadi e di antîc al vignìs sù cence savê parcè e cemût"

gjavât fûr di "La aghe da pît la cleve" di Dino Virgili

"un inamorât si vise di ducj i particolârs e al sint ancjemò il sgrisul de prime strente e de prime bussade"

gjavât fûr di "Sant Jacum, là che al finìs il mont" di Antoni Beline

sgrisul s.m.
(sgri-sul)

Vibrazion o fenomen che al somee vê vibrazions (fig.)

sinonims

trim, smalit

esemplis

"tal suspirâ de sere al restave cualchi sgrisul di lûs - il cimiâ des stelis o il tremâ des lusignutis"

gjavât fûr di "La aghe da pît la cleve" di Dino Virgili

"ce maravee, un sgrisul di bufulis sul mâr che al pareve un pedrât"

gjavât fûr di "Come tai romançs" di Alan Brusini

monolengâl