SuperDizionari

simbul s.m.
(sim-bul)

Ce che, par convenzion o par associazion di ideis, al riclame o al rapresente alc altri, massime un concet astrat, une cundizion, une situazion, une realtât plui grande e v.i.

sinonimi

embleme, imagjin, rafigurazion, rapresentazion, segn, steme

esempi

"il Gjal e la Tartarughe [...] a lotin fasint di simbul de lûs che e rive e dal scûr che al lasse il pas"

da "I mosaics de basiliche di Aquilee" di Giovanni Battauz, Flavio Cossar, Renato Iacumin

"il simbul di Pasife e il Taur al riclame la union de anime e dal cuarp, ven a stâi la creazion dal “om esteriôr”"

da "Il brevet" di Mario Turello

simbul s.m.
(sim-bul)

Robe o persone che e incjarne un concet, un valôr, une situazion e v.i.

esempi

"al alçà i voi de pagjine e si metè a ridi di gust. [...] Peredònov, chel professôr di liceu paranoic [...] par lui al jere il simbul di dut ce che al cualificave in negatîf un piçul borghês"

da "Tal ospedâl" di Amedeo Giacomini

"e po: la rivoluzion! La rivoluzion! Il tren al è il simbul dal moviment, de rivoluzion! E la art, la poesie, la leterature, il cine! Il tren al è vite, parcè che la vite e je moviment"

da "Donald dal Tiliment" di Stiefin Morat

simbul s.m.
(sim-bul)

[TS] (polit.) Figure regjistrade in maniere uficiâl, che e rapresente un partît

sinonimi

simbul eletorâl

esempi

"[tes elezions europeanis dal 1979] il Moviment Friûl al metè siei candidâts sot il simbul de Union Valdotaine"

da "Memoriis di politiche linguistiche" di Adrian Cescje

simbul s.m.
(sim-bul)

Segn convenzionâl doprât in plui dissiplinis sientifichis par entitâts, grandecis, operazions e v.i.

sinonimi

segn

esempi

"il supuart de informazion, la “materie prime” che e ven instradade su chestis rêts, a son miliarts e miliarts di simbui binaris (“zeros” e “uns”)"

da "La societât de informazion: cirint lis origjins" di Valentino Castellani

simbul s.m.
(sim-bul)

[TS] (religj.) Formule che e pant in struc i ponts fondamentâi che a dan dongje i crodints di une comunitât

esempi

"e dîs une tradizion che i apuestui, prin di dividisi, a àn decidût di fâ une sorte di struc des veretâts, chês propit essenziâls e dome chês. Metût adun il “simbul”, ogniun si è cjapât un toc, di mût che, tornantsi a cjatâ e metint insiemi ogni toc, e tornàs fûr te sô integritât la profession di fede o simbul"

da "Sant Jacum, là che al finìs il mont" di Antoni Beline

monolingue