SuperDizionari

specialitât s.f.
(spe-ci-a-li-tât)

Il jessi speciâl, particolâr

sinonimi

particolaritât

esempi

"un Vanzeli che al sarès stât componût adiriture di Sant Marc Evangjelist, e che al varès dimostrât la specialitât di une Glesie Basilicane, peade al so teritori e a la sô int"

da "Siums di storie" di Angelo Floramo

specialitât s.f.
(spe-ci-a-li-tât)

Carateristiche speciâl, tipiche

sinonimi

particolaritât, tipicitât

esempi

"une altre “specialitât” de culture furlane, derivade de sô storie, e je chê di jessi “une crosere di popui”"

da "Pre Checo e la storie" di Gian Carlo Menis

specialitât s.f.
(spe-ci-a-li-tât)

Categorie particolâr, individuade di sôs carateristichis diferentis di chês di altris categoriis

sinonimi

sorte, categorie, cualitât

esempi

"cerçâ dutis lis specialitâts di vin"

da "Pre Pitin" di Antoni Beline

specialitât s.f.
(spe-ci-a-li-tât)

Fat particolâr, circostance specifiche

sinonimi

câs, circostance

esempi

"ancja chei vegneran a proporzion, seont la circostança de la specialitât, straordinariamentri cjastiâts"

da "Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera" di Antoni Brumat

specialitât s.f.
(spe-ci-a-li-tât)

Setôr di ativitât caraterizât di funzions e competencis particolârs

esempi

"il teme de esperience e dal ampliament de casistiche di operativitât dai miedis e dai sanitaris al pues jessi decidût in maniere oportune cuntune turnazion di personâl tra nosocomis grancj e piçui. Chest al tocje la ostetricie, ma ancje tantis altris specialitâts medichis"

da "Tisane o Palme? Il Friûl al à bisugn di ducj i doi i ponts nassite" di Roberto Pensa

specialitât s.f.
(spe-ci-a-li-tât)

Ognidun dai setôrs di une stesse ativitât sportive

esempi

"[tal speedway] si pues cori ancje su la glace, e chê specialitât e à non ice-speedway"

da "Marama Toyo, l’istrian che al amave il speedway" di Davide Francescutti

specialitât s.f.
(spe-ci-a-li-tât)

Azion, prodot o preparazion che si fasin cuntune abilitât particolâr

esempi

"un biel pâr di dalminis di pôl, specialitât de Dite"

da "Lis predicjis dal muini" di Josef Marchet

"mi vignive dongje riduçant par fâmi cerçâ une sô specialitât: la sgnape di barancli"

da "I forescj" di Alan Brusini, Gian Paolo Linda

specialitât s.f.
(spe-ci-a-li-tât)

[TS] (med.) Preparazion farmacologjiche metude in cumierç za pronte, no preparade dal speziâr

esempi

"cheste specialitât nissun [speziâr] la ten... Bisugnarês fâle vignî di Milan..."

da "Il speziâr" di Costantino Smaniotto

monolingue