SuperDizionari

spie s.f.
(spi-e)

Cui che al cîr di scuvierzi informazions segretis o risiervadis e che dopo lis fâs savê a altris che a àn interès di savêlis

sinonims

spion

esemplis

"cui no disevial che il Vatican al voleve la vuere e che al veve lis sôs spiis pardut?"

gjavât fûr di "Sul agâr" di Pieri Menis

"in chei moments nissun si infidave des peraulis, cun tantis spiis fassistis che a jerin pal mont"

gjavât fûr di "Il muc" di Roberto Ongaro

"za agns prime spiis industriâls i vevin gjavât sot dal nâs e brevetât une sô invenzion"

gjavât fûr di "Codiç" di Spirt Anonim

spie s.f.
(spi-e)

Piçule buse che e permet di cjalâ cence jessi viodûts o di tignî controlât un sisteme, un aparât e v.i. cence vierzilu e cence mudâ il so funzionament

esemplis

"[l'oseladôr] te casopute de “traviarse” al veve la sente, denant di une spie tal mûr"

gjavât fûr di "Cjase di Dalban" di Maria Forte

spie s.f.
(spi-e)

Dispositîf che al segnale un funzionament o une cundizion, soredut tun machinari

esemplis

"la spie rosse de telecjamare"

gjavât fûr di "Il Paron(i) des telecjamaris" di Jan Toti

spie s.f.
(spi-e)

Cualsisei element che al fâs capî une realtât, un fenomen (fig.)

sinonims

indizi, jenfrisegn, manifestazion, segn, segnacul, simbul, sintom, prove

esemplis

"la lenghe in sumis e je la spie fedêl di dute la anime, sedi di une persone, come di un popul"

gjavât fûr di "Un element fondamentâl dal moviment autonomistic" di Josef Marchet

"cualchi lagrime intant sbrissave fûr, spie del sentiment, del amôr inocent"

gjavât fûr di "Zoventût e Primevere" di Pieri Çorut

spie s.f.
(spi-e)

Cuantitât minime (fig.)

sinonims

segnâl, jenfrisegn, fregul, fruçon, tic, tinin, tininin

esemplis

"no si viodeve une spie di lusôr di nissune bande"

gjavât fûr di "Sul agâr" di Pieri Menis

monolengâl