La Ongjarìe e je un stât european e Òngjar al vûl dî “ongjarês”. Il non, o ben sorenon, al sarà stât dât a une persone che, par lavôr, e jere stade par un ciert timp in chê contrade o a un vêr ongjarês trasferît in Friûl. Tai secui passâts nol jere râr lâ in Ongjarie: Biel tornant da l’Ongjarìe... Tal 1443 ben 4 ongari a murivin tal ospedâl di Vençon. Sot de vôs denari dadi alli signori preti il cjamerâr de fradaie dal Ospedâl al segnave cussì: per far inolear 2 hongari soldi 12; per dinari dey ali sora diti per inolear un ongaro soldi 4; adi 30 marzo dey a pre martin loqual li lasso un ongaro murij, che li dovesse dir le trenta mese ducati 1 doro… No si à però di smenteâsi che in cierts dialets venits (di fat chest cognon al pues ancje jessi venit, tipic di San Polo di Piave in provincie di Trevîs), l’adietîf òngar al vûl dî “trist, sporc” (De Nardin e Tomasi, 1991) e che Òngjar, daûr dal NP al jere, par antîc, ancje un non di persone. Tal Schedari Corgnali: 1348 magister Ongarolus a Udin; 1417 mag.co Venuto dicto Ongaro pell. a Udin; 1464 campum Nic. Ongar a Favuîs. A Udin tal 1433 Agnis moier che fo di Zuvan Hongero, tal 1436 Tomas Onger (Vicario, 2001 b). Il cognon al è pluitost slargjât a Cordenons (1607 Jacobus del Onger; 1640 Giacomo dell’Ongaro) e a Rivis Darcjan; a son tancj a Malnîs di Montreâl (tal 1570 Lunardo de Longaro; tal 1578 Antonio de Longaro di Griz, tal 1624 Zanutto Ongaro da Gricio), a Spilimberc, Sacîl, Monfalcon; si cjate intune desene di altris paîs. A Glemone al è derivât dai Puppini: tal repertori dai batisims 1379-1404 al è atestât Ungari prius Pupinii; dal 1496 al 1545 a son documentâts uns dîs batisims cul cognon Ungari seu Ongari; tal 1547 Joannes Antonius filius Francisci Ongari (Tomat, 2001); trê fameis tal 1929. A For Disore al è il toponim l’Òngjar, borc de frazion di Vîc (tal 1497 Michaelem del Onger gastaldo).