Par furlan agâr al vûl dî “incision te tiere fate cuntun imprest” e, in mont, ancje “canalon” e simii. Chest cognon al derive di un microtoponim, ven a stai di une localitât clamade Agâr, secont ce che al à ben dimostrât bons. Biasutti tal so libri su Forgjarie publicât tal 1976. Un Stephanus de Agaro al è documentât a Dusà tal 1262 (Corgnali), un Petro Agario tal 1292; in Cjargne o cjatìn un Nicolaus q. Odorici de Agar de Gorto tal 1485 (Archivi Roia). La forme D'Agàro e je concentrade soredut a Rigulât (1773 don Leonardo d'Agaro da Ludaria tal Schedari Biasutti), ma e je presinte ancje tal Cjanâl Pedarç (comun di Prât di Cjargne), a For Davôtri e a Udin.