Dal non di persone August cu la semplificazion dal grup vocalic iniziâl, o retroformazion da Agostin, forme une vore plui comune te Ete di Mieç che no August (CI 29). O pûr di Avost, l’otâf mês dal an, non che al pues jessi stât dât a un nassût in chê dade di timp. Viodi ancje Agosti. Tal 1395 Matteo q. Avosti de Blessano; tal 1429 Avost di Buie. Te tabele dai ats di matrimoni de glesie di Pagnà e je la regjistrazion di un Agosto za dal 1688 e di un D’Agosto tal 1690 (Sguerzi, 1988). Il cognon al è avonde comun a Passons (comun di Pasian di Prât) e al è presint ancje a Murùs e a Udin. Tal comune di Reane si cjate sedi Agosto che D’Agosto; tal Schedari Biasutti si lu cjate documentât in cheste zone prin tant che non di persone (1360 Avosto q. Zannissio di Valle di Reana), po dopo tant che probabil cognon (1365 Augusto q. Valgendo Avosto da Reana vende al fratello mezo campo in Maseris di Reana) e, infin, sigûr tant che cognon (1528 Agosto Giacomo figlio di Giovanni Augusti da Reana assume livello verso Antonio Falzario q. Filippo Franzil di Segnacco; 1740 d’Agosto don Bernardino q. Ioseppo da Reana). La difusion di Agosto come cognon e je dimostrade a Feagne dal Cuatricent cuntun Pietro Avost (chi o vin il toponim Prado d’Agosto tal Sietcent) e di Jacomo di Zuan d’Agosto a Reane tal 1556 (Zuan de Avost d’Areana tal 1568) là che al esist un Borgo d’Agosto. A Feagne il cognon si à estint te prime metât dal Nûfcent par emigrazion des fameis a Roncjis di Monfalcon e a San Ganzian; i Agosto di vuê a son imigrâts dopo di matrimonis e no son peâts cu la vecje cjasade (Zucchiatti 2008, 23).