Cun alzète il NP al intint “camuf, plee largje che si fâs te part inferiôr de sotvieste par podê slungjâle se al covente, o ancje par ornament". Al à di jessi stât, duncje, un sorenon o un non di mistîr. Il cognon al è une vore frecuent a Griz di Montreâl, là che al è documentât almancul dal 1597 cun Bernart de Alcetta (Catapan de Fradese di Griz). La stesse font e ripuarte, tal 1577, ser Mario Del Cetta da Grizo: chest al podarès fâ pensâ a une derivazion di (D)al Cetta / Alcetta / Alzetta (viodi Del Cet). Si cjate ancje a Vignesie e a Triest.