Al è un cognon de alte Val di Illasi (VR), di probabile origjin cimbre (chel che al ven clamât “cimbri" al è un dialet todesc bavarês fevelât in cualchi teritori dal Venit, ma li cuasi estint, e dal Trentin; NdA). Ae fonde al sarà il cognon sudtirolês Anderlan, che si pronunzie Anderlon; chest al derive di une localitât *An-der-Lòn che al vûl dî “(mâs) dongje dal jet di un riul di mont". Cun esatece, il tirolês lòn (todesc leterari Lahn) al vûl dî “toc di teren cjapât dentri di une lavine, di un slac", ma il toponim al pant in realtât une altre vôs tirolese lòa (todesc leterari Laine) che e vûl dî “riul di mont". Il cognon al è, duncje, de componente sudtirolese dai Cimbris. La o vierte origjinarie e je deventade sierade par vie de influence dai incressitîfs venits in -ón. Salacor, dai XIII Comuns (in provincie di Verone, dulà che si fevelave il cimbri; NdA) al rive il ram bressian dai Anderloni; se no, si varà di pensâ par chel ca a un derivât dal trentin o svabi *Anderle, derivât di *Anderl o *Anderle, diminutîfs di Andreas “Andree" (Rapelli, 1995). Te nestre regjon si lu cjate a Udin.