Al è il diminutîf dal non di persone antîc Anzio che al è documentât dal 1256 indenant cun Anzio de Mels. A son une vore lis atestazions plui tardis: intal 1271 Ancius de Straso, intal 1278 Anço gastaldione de Faganea, intal 1290 Ancius de Plasencis, e v.i. La forme diminutive e salte fûr pe prime volte intal 1241 cun Anzuttus di Mels e e va indenant cun Anzuto di For Disore, paîs là che al resist ancje vuê il cognom Anziutti. Intal Schedari Corgnali: 1492 Pietro, Daniele e Giovanni Anziut da Forni di Sopra; 1582 Daniel Danzutt di Forni di Sopra abit. in Pontebba. In graciis de grande documentazion sul non Anzio tal Schedari onomastic Corgnali, o pensìn che e sedi cence fondament la propueste di derivazion di Anzolùt (La voce fornese, 1949). De Stefani 2003, 109 al tire par une derivazion di *Anzi(l)ut diminutîf di Anzil, variante di Janzil, duncje peade a une des formis todescjis dal non “Zuan” (viodi Ànzil). Presint ancje a Udin.