Dal non di persone Asquino, di divignince gjermaniche, che une volte si doprave. Tal Schedari Corgnali: 1166 Ascuin de Muruz; 1255 Asquino de Flagonea; 1255 D. Asquinus de Varmo; 1274 Asquinus de Tricesimo; 1278 Asquino scriba de Osopio; 1300 Asquino de Buja; 1306 D. Asquinus de Coloreto fil. olim di Vilielmi de Venzono; 1317 Asquin de Cormono; 1366 Caterina vedova di Asquino di Colloredo dona due serve alla chiesa d’Aquileia. Tai documents dal archivi di Murùs al è regjistrât, tal 1166, un ciert Ascuin de Muruz; tal 1255 e je la testemoneance di un Di Asquino de Flagonea, e v.i. Tal 1584 a Glemone Petrus et Nicolaus filius D.ni Petri Antonii Asquini (Tomat, 2001). Cognon slargjât a Udin, Monfalcon, Codroip, Maian, Pordenon, Vildivar, Basilian (a Varian e a Visepente al è rivât tal 1892 di Musclet passant par Gridiscjute) e presint ancje a Cjamin dal Tiliment, San Denêl, Tavagnà, Muçane, Rivignan, a Romans e Lavorêt (Vildivar), a Cosean e a Pasian di Prât. Te mape IGM di Feagne une Cascina Asquini: culì il cognon al jere chel di un dai nobii di Darcjan Disot che intal an 1417 al veve vût feuts a Feagne e si jere stabilît là dant principi a une dinastie che in paîs e tignì simpri un ranc elevât (Zucchiatti 2000, ma viodi soredut Zucchiatti 2008, 27-28). Vie pai secui XVI, XVII, XVIII i Asquini nobii di Udin a jerin parons di diviers terens tal teritori di Cjampfuarmit, paîs dulà che e esisteve ancje une famee “rurâl” cul stes cognon; facil che cheste (1689 Mattia Asquino di Campoformio) e ves cjapât il cognon dai nobii parcè che e lavorave lis lôr tieris o e veve rapuarts cun lôr.