De Stefani 2003, 238 al da une spiegazion magjistrâl di chest cognon cjargnel: “Al è un cognon râr che si cjate a Vile di Cjargne; tal 1937 a jerin dôs fameis ancje a Desemon Disot (Schedari Corgnali). Al è clâr che no àn nuie a ce fâ cul gas omonim. Si zonte invezit ae lungje schirie di nons di famee derivâts dal sorenon zuet “çuet”, su chest teme viodi Delli Zotti. Tancj di chei cognons che vuê a scomencin cun De, Del, Della, e v.i. tal latin notarîl si scrivevin tant che à + ... Par secui, par esempli, tes cjartis uficiâls i Del Negro a jerin rindûts cun à nigro, à nigris. Cussì il sorenon, dopo deventât cognon, di chei che de int a jerin clamâts dal zuet al vignive scrit tai documents à zoto, plui indevant azoto, Azoto. Il riferiment al difiet fisic nol jere plui ricognossût de int e la forme si è mantignude te variante notarîl. Almancul un riscuintri: ai 29 di Dicembar dal 1498 si cjate Jacobo azotto de Imbeleno (ASU, a. n. 4880)”.