La peraule barei e pues volê dî “teren dûr, no coltivât" e si pues colegâ a bâr, o ben un toc di tiere cun jerbe parsore, che si distache cuant che si lavore il teren. Al sarà stât, in origjin, un sorenon o un microtoponim. Al podarès ancje derivâ di une variante dal non di persone Barone che si doprave te Ete di Mieç, e nol è di escludi un plurâl di Barel (viodi). Il centri di iradiazion di chest cognon al pâr che al sedi Morsan des ocjis (1745 Barei Carlo pubblico perito; 1777 Barei Giovanni notaio); si lu cjate ancje a Cjasteons di Strade, Udin e, par Castellarin 1990, a Malefieste di San Michêl dal Tiliment, Perteade, Roncjis di Tisane, Vât e Vildivar.