Cognon carateristic di Culine di For di Avoltri, studiât di Enrico Agostinis 2001, che al scrîf che "a vuê al è cetant presint a Culine e al è il prin non che si cjate inte anagrafe (Antonio di Leonardo, n. 1594), e ancje chel plui frecuent. Al è un endemisim, cun dute probabilitât autocton: suntun totâl di 16 presincis in Italie, 5 a son a Culine e chês altris 11 a son dutis di emigrâts o che a divegnin di emigrâts. La esistence sul puest di plui nuclis familiârs sul finî dal secul XVI e fâs pensâ a une presince za chê volte consolidade intal timp e databile a almancul trê gjenerazions indaûr; par chel la famee Barbolan e pues jessi calcolade, come altris sîs o siet, fra lis “fondadoris" (o almancul primordiâls) di Culine. La origjin dal non e je incierte. L'antîc, di ispirazion latine, Barbula / Barbule (par Barbulae?) de anagrafe dal Sîscent al fasarès pensâ - plui che ae lidrîs "barbe" tal significât di parint, che tal latin di tornade al varès tal câs gjenerât un Barbulus masculin, par altri mai rilevât - a un diminutîf cjarinatîf dal feminin latin “barbe", duncje barbula “barbete"; di li Barbulanus, che si è evolût intal za frecuent Barbolano, e duncje intal definitîf Barbolan. Al è curiôs notâ, par altri, cemût che la forme venite furlane Barbolan e sedi ae fin prevalude (e je la uniche forme moderne stabile) su la version volgâr / taliane Barbolano, contemporanie di cheste se no fintremai anteriôr".