Forsit diminutîf dal non di persone Bardo, doprât te Ete di Mieç e forme scurtade di nons tant che Lombardo o Bernardo. Massime pe forme Bardella (che si le cjate a Vignesie, in plui che a Jesolo, Cjaurlis, Tisane) no podìn, però, trascurâ il venezian bardèla (che al corispuint al furlan bardele) che al vûl dî “cjacaron, peteçon"; un adietîf che al pues ben vê gjenerât sorenons e, duncje, cognons. Par Soranzo 1996 si podarès configurâ ancje tant che un sorenon antîc di mistîr che al ven di "barde", o ben une armadure a difese dal cjaval di arme, e di li il verp "bardâ", che al vûl dî furnî di finiments, cjamâ di vistîts e di acessoris scjassôs. Un sorenon Bardella al cjatarès justificazion tal procediment che, daûr di chel, i assegnâts a ciertis funzions a son dispès indicâts cul non di un ogjet di ûs: intal Venit, par esempli, a son ancjemò vuê vîfs i sorenons di mazzocca par pitôr e di mezza-cazzola par manoâl. Intal Schedari Corgnali: 1320 Artuyco Burdela de Aviano; 1322 Burdella de Braçaco; 1363 olim Pidrussy dicti Bardelli a Cicunins. La forme Bardelli si le cjate a Udin. Il poete di Flaiban Argeo, inte poesie Gnot", al à metût dentri cheste filastrocje che e ricuarde il cjant nojôs dal crot: Biele biele bardassele ferme ferme chê bardele; se a lis vot no ven dibot, ven usgnot, spiete là sot.