Al vûl dî “origjinari di Barcis". Il -z- si pronunziarà, duncje, come te peraule taliane “piazza" o, miôr inmò, si pronunziarà c come te peraule “cene". Intal Schedari Corgnali: 1222 Barzanum a Polcenic; 1298 Walteri Barçani de Maniaco; 1338 q. Odorici Barçani a Manià; 1394 Domus d.ni presb. Antonii della barzana a Udin; 1475 q. Anthonii Barzani de Boncicho; 1522 q. Floriti Barzani de Pedemonte Aviani a Purcie; 1674 Lorenzo Barzan a Fane; 1700 Dom.co Barzan a Frisanc. Cognon avonde slargjât a Claut e Davian, presint a Pordenon, Vaiont, Sacîl, Longaron e Prate di Pordenon. A Manià, i toponims Ponte dei Barzani, Piazza detta dei Barzani, Fontana detta dei Barzani, Rugo (= riu) dei Barzani a jerin li che e je vuê vie Piave, dongje dal Bar al Ponte (Olivetto et al., 1993). Ancje Pala Barzana, une volte mulatiere e cumò strade asfaltade che dal comun di Frisanc e va bande Andreis e Barcis (ibidem). Ta la Riba di Barçàn a veva poiât radîs par prima un’ostaria (Alla Casasola) par volêi di un om rivât da Barcis. Comi par tindi un’oselada da tirâ i sedonârs e scarpetârs da la Valcilina chi, ogni lunis di mercjât, a talpinavin par ì (di sancugnêi), sul ’zì e sul tornâ. In banda da la puarta, sul ’zì dentri, al veva preparât ’na bancja, fissa e a misura, ch’a tigneva parchegjâts i cos. Scuasi ducju chêi clients a paiavin cun gjeners il siô bevi…: a erin pì siôrs di seit chi di bêçs (Aldo Tomè, in Olivetto et al., 1993).