O din la peraule a Bongioanni 1928: “Etimologjie une vore misteriose. Mancjant di miôr, mi pâr che no sedi di refudâ il langobart abiscaro, aviscaro, che par Weber al sarès “il sorintendent ai trops dal re"; il Brückner invezit al interprete biscario tant che “uficiâl judiziari" o alc di simil. Tra chescj doi todescs savints no vûl fâ di arbitri". Za Olivieri 1923 al confutave lis ipotesis ca parsore e al puartave in cjamp Villa Baschera, localitât di Grantorto tal Padoan  (duncj un toponim), il bas latin basclerius “sorte di spade", il talian antîc “bastiera", il feminin dal trentin bàscher “balinere, sacut dulà che si tegnin i balins", che a Rovereto al sarès ancje “coglia"… Plui inzornât, al è evident, Rapelli 1995: “Di un sorenon tirât fûr di une vôs venite *baschéra o *baschiéra (ma ancje *baschèra, *baschièra, daûr de zone) che al vûl dî “sfodre, custodie (di spade o di curtìs)". Chê vôs, che no cjati documentade, e je ricostruibile daûr dal talian baschiera “nature de femine" (citât di A. Oudin, 1663), istrian baschèra “sfodre di un curtissat ", trentin bàscher “balinere"; a Rovereto “coglia". Cognons di chest gjenar si cjatin a Vignesie  (Baschièra), tal trentin (Baschèra), a Udin (Baschièra, Bascarutti); di rimarc al è che tal Dusinte al è in Toscane un Baschiera de’ Tosinghi e il toponim florentin Porta del Baschiera, dulà che la peraule e pues jessi une intrusion che e rive des Veneziis". No podìn, però, trascurâ Violi 1996 cuant che al trate dal cognon Baschieri: “Al è un cognon vîf in diviersis bandis dal teritori modenês, e al rimonte al non propri Baschere, Baschera, atestât a Modena dal 1162. Intun document di chel an, di fat, il vescul Indrì al concêt a fit terens  a Vaciglio, a un ciert Baschere “filius Dominici de Saxolo". In documents di dopo, dal 1163, dal 1173 e dal 1175, o cjatìn il stes non, tant che confinant di terens de stesse zone. Si trate cuasi dal sigûr di un non di mistîr, passât a non propri. Vâl a dî dal latin vascularius “vasâr; oresin" “fabricant di vâs di metal preziôs" si è passâts a *bascularius Þ *basculerius Þ +basclerius cul v- iniziâl in b- (come tal medilatin basca par “vascje"), e cul scambi dal sufìs -erio par -ario e la colade de -u- mediane, daûr di une normâl evoluzion fonetiche. In chel mût, di *basclerius si è rivâts a Baschere e Baschieri". Un Canciano Baschera da Vendoglio tal 1453; Daniele q. Giovanni Baschiera di Vilote di Cjons tal 1489; Baschera Nicolò q. Pietro di Asio cjamerâr de plêf di San Martin tal 1490; Giovanni q. Nicolò Baschiera de Clauzeto tal 1525 (Schedari Biasutti); Simon Basciera da Sedran tal 1542; Valentina Baschera de Borgo Viola tal 1554; Leonardus Bascheruttus a Atimis tal 1571; Bulfonus q. Joannis Baschera de Adegliacco tal 1580. A Feagne tal 1684 Baschera Pietro qm. Giobatta, e di li il toponim Mont di Baschère (Zucchiatti 2000; Zucchiatti 2008, 30-31). Il cognon Baschiera si lu cjate a Clausêt (1515 Nicolao q. Petri Baschiera de Clauzeto), Davâr e Udin (cetant presint a Triest). A Feagne e sorevîf la forme Baschera. Un “borc Baschera" a Trep Piçul (tal catapan di Buie si cjate un Lenardo Baschiera de Treppo parvo tal 1488) in comun di Trep Grant; Buse di Baschere al è un toponim a Cjassà: prâts in val, di Nord a Sud, che si slungjin ancje bande Trep Piçul. Fûr par li al passe il riul Trep, che al tocje il borc Baschera di chel paîs (Mattioni, 1923).