Cognon presint a Monfalcon e San Ganzian. La pronunzie tant furlane che bisiache e je Benès, ma e tint a prevalê la dizion triestine Bènes. La etimologjie e je incierte. A podaressin vê un rûl un non romanic, augurâl e gratulatori Ben(e), un antroponim gjermanic tant che Benno / Behn, presint te Ete di Mieç ancje fra i Latins (viodi i cognons talians Benni, Benelli) cu la zonte dal sufìs antroponimic –ès. O pûr un personaç antîc slâf, cun confronts pôc clârs: viodi il cognon Benez a Insic tal secul XVI, il vecjo cognon Benesa di Dubrovnik, il microtoponim Beneži a Sudovest di Pinguente / Buzet, il cognon cec Beneš e v.i. No si pues invezit confrontâ cul cognon venit Benetto (-etti) che al derive di Benedictus cu la pierdite de dentâl, fenomen no presint tal bisiac, in plui si varès di postulâ un plurâl sigmatic furlan in -ès (Maurizio Puntin).