Daûr Olivieri 1923, al podarès vignî dal tiermin de zone di Rovigo caldàna “chê part dal fossâl là che la aghe no si glace". Caldàna al è, però, ancje un tiermin agronomic de lenghe taliane. Di fat, le caldane, a son costruzions fatis di pueste, o pûr sistemazions dal teren, che a oblein la aghe a scori par un trat lunc, e duncje a scjaldâsi prime di rivâ te culture. Caldana al pues volê dî ancje “calôr improvîs te muse e tal cjâf, scat brusc di stice o di rabie". Par Rapelli 1995, al ven di sigûr di un non compagn di localitât, ma al è dificil capî cun precision cuâl che al sedi, stant che inte Italie centri setentrionâl a son plui toponims Caldana. Tal Schedari Corgnali: 1393 Jacobo dicto Caldana a Puart; 1428 Ioannes Cheldana alias Caldana a Muçane; 1452 Simeon q. Jacobi Caldana a Siest. Si lu cjate a Pasian di Pordenon e a Udin (al è  difondût avonde a Verone, Toscolano Maderno in provincie di Bressie, Vicence).