Celànt al è il non di trê piçui centris abitâts (ducj italianizâts in Celante) che a son dongje tra di lôr, ma a son sot di comuns diferents: Celant di Clausêt, Celant di Vît e Celant di Cjastelgnûf (1575 Odorico Celante). Tal 1341 Micael çener Veneris de Celantto a Spilimberc. Il cognon al podarès volê dî cui che al è di chei borcs li ma, cun N. Petris, o pensìn che al podarès vignî ancje dal latin cella “dipuesit” con la zonte dal sufìs che al mude il leme in sostantîf -ànte, duncje par dî “un che al lavore tal dipuesit o che lu vuardie”. A Dieç, tal comun di Tumieç, il toponim Pàlas Celànt, o Pàlas Celànz, o dome las Celànz. Cognon tipic di Polcenic (1676 Gio. Domenico q. Daniele Cellant di S. Giovanni di Polcenigo); al è a Pordenon, Udin, Vildiflum (ancje come Celante), Cjanive (massime Saronis), Fontanefrede, Sacîl, Sietim (Cint). O ripuartìn Petris 1999: “Pe origjin dal cognon, no son dubis che al vegni dal latin cella, che al à un significât che al cambie daûr de ete: di “entitât minime dal ream”, “piçule glesie di cjamp tignude vierte pal cult di un frari separât de badie o dal priorât centrâl”; dopo, dome “piçule aziende agrarie benedetine”, e infin “dipuesit di pomis di cjamp”, “cjanive”, “betule”. Tal nestri câs, cul sufìs -ante che al mude in sostantîf, al à di vê volût dî “magazenîr, ostîr”.