Al ven di un diminutîf dal furlan ceòle (ma ancje cevòle, civòle), o dal venit cèola cul stes significât. Il sorenon Cevòla e Cevolìn al è ancjemò vuê presint in plui borcs che o cognossìn. A Cjasteons di Strade za tal 1488 al jere un Francesco Civolino e, tal 1669, un Domenego Cevolino e un Francesco Daniel dit Cevolino. Di ulì, salacor, al ven il cognon di vuê Ceolìn presint ta chel comun (Costantini, 1972). Il toponim Ceolìni, tal comun di Fontanefrede, come che e dimostre la documentazion presentade di Nilo Pes, al ven par ciert di un grup di fameis Ceolìn che al à origjinât il paîs (fameis che dopo a àn mudât il cognon cun Rossetti, che al jere un stracognon antîc di un branc dai Ceolìn; duncje, vuê, a Ceolìni nol è nissun Ceolìn, ma a son une vore di Rossetti!) (Fadelli, informazion personâl). Chest cognon si lu cjate massime tal comun di Fontanefrede (culì al è ancje il toponim Casa Ceolìn IGM), ma al è presint ancje a Daçan, Vildiflum, Udin, Cordenons, San Vît dal Tiliment, Cjons, Pasian di Pordenon, Sacîl, Brugnere, Codroip, Concuardie, Pramaiôr, San Stin, Cjamuel (Teôr), Cjaurlis, Gjai di Sacon (Danon), Lignan.