Il cognon Chiabudìni (forme origjinarie: Chebudín/Čebudín o Chabudín/ Čabudín) al è presint tal comun di Pulfar almancul de metât dal Sîscent. Di fat, al comparìs pe prime volte tai libris dai batisims di San Pieri il prin di Zenâr dal 1650, cuant che e je stade batiade Agnes filia legitima Andreae Chabudin et eius uxoris Vrsula de Lasa. Andrea Chabudin al vognive forsit di Borjana, un paisut dal Breginjski kot (dongje Cjaurêt, vuê in Slovenie). Dai libris de parochie di Cjaurêt al risulte che il cognon Chiabudin al jere tipic dal paîs di Ladra che al è te rive di çampe dal Lusinç, a 3-4 chilometris di Cjaurêt. I libris dai batisims a atestin la presince di chest cognon a Ladra te prime metât dal 1600: die 29 7bris 1640 Vrsula filia leg. Zebudin et vxoris eius Magdalenae ex Ladrach; Die 18 Feb. 1646 Matthias f. leg.us Valentini Giabudin et Lenae uxoris eius de Ladra. Si pense che il cognon al sedi emigrât di Ladra a Borjana e di chi a Cicigolis (Pulfar) prime dal 1650. Purtrop no rivìn a documentâ chescj passaçs parcè che i libris dai matrimonis di San Pieri a tachin tal 1660 e chei di Cjaurêt tal 1713. Al è interessant notâ che il cognon Chiabudini si è studât propit dulà che al jere nassût, te zone di Cjaurêt, ma si è mantignût te Val dal Nadison. Il significât etimologjic nol è clâr, ma par cumò o savìn almancul di dulà che al ven e dulà che al pues jessi nassût. Forsit un studi fat a Ladra al podarès dâ altris informazions su chest cognon che par tancj al veve di jessi tipic des vals dal Nadison, ma che invezit al ven di par di là dal confin, come tancj altris cognons (Zuanella, Dom, 13, 1998). 1989 Luciano Chiabudini, scritôr di narative e poete liric, nassût a Cicigolis tal 1931, i ven conferît il premi “Banca di Antro” (Nazzi, 2002).