Nol è un incressitîf di cjâf (che une volte si scriveve chiav), ma al è un etnic: a Lauc al è documentât un puest che si lu scriveve Chiaua (salacor si pronunziave Cjava e al podarès corispuindi a Cjavaç di vuê) e tal 1583 si à un Chiavotty di Chiaua de Vinaio. Come che al osserve De Campo 2003, tal comun di Lauc tancj etnics si son fats cul sufìs -òt: di Trave al ven Travòt, di Davai Vaòt, di Vile di Cjargne Vilòt... Cognon di Daleniis di Lauc (1550 Joannis Chiavot de Laucho) e di Madrîs di Feagne. Tal 1584 a Glemone Lucia Dorotea filia magistri Joannis Francisci Chiavotti, chest al è indicât tant che textoris tal 1598 e duncje al è probabil che al vegni de Cjargne.