Chiacig al è un cognon endemic, ven a stâi che al è esclusîf di Altane (tal comun di San Lenart) di dulà che dopo al è emigrât te plane. Lu àn trascrit cun plui formis (Cacich, Kiatzitz, Gjaziz...) che, al è facil viodilu, ae fonde a àn Čáčič, massime se o calcolìn che la letare slovene č une volte si le trascriveve cui digrams ch e gh e cu lis letaris latinis c, g, z. O vin simpri di tignî cont di chest cuant che o tratìn e che o leìn i cognons de Slavie furlane, che la plui part a àn mantignût fin a vuê une grafie antighe che e rimonte ai secui XVII o XVIII. Il cognon Chiácig vuê si lu pronunzie sbaliant Kjáčič impen di Čáčič: chest al capite cuant che si lei une grafie antighe daûr des regulis modernis. La origjin dal cognon e je te peraule tipiche dal lengaç infantîl čáča “pai, papà”, cu la zonte di -ič (scrite culì -ig). Cheste peraule no je plui tal dialet sloven dal Nadison, ma si manten tal dialet sloven de Tor (Zuanella, Dom, 16, 1990).