Cognon tipic de Cjargne. Stant che a Fielis (comun di Zui), tal 1776, dongje di un Giacomo Ciment al jere un Gio Batta Zument, si pues pensâ che chest cognon al vegni di zument “cjavale", ma ancje di un sorenon par dî di une "femine sbrenade, che no si rive a tignîle". Bongioanni 1928 le pense in maniere diferente: “il cognon cjargnel Cimenti, intune regjon che e à conservât il nes latin cl, al somee une anomalie, ma no lu è. La forme locâl che mi à segnalât il gno consulent pe Cjargne, D. Antonio Roia, e je Ciumènt, dal carintian Kment = Clemente". Noaltris o podìn dome zontâ che la pronunzie di Zumènt, a dî il vêr, e je Ciumènt (che po al è facil rivâ a Cimènt), ma nus restarès di sclarî il passaç di Kment a Ciumènt / Cimènt. Il cognon al è a Vile di Cjargne, Enemonç, Tumieç, Davâr, Zui, Paluce, Udin, San Denêl. Tal Schedari Corgnali: 1589 Zuan di Zument di Vinaio; 1736 Maria vedova Deciment a Zui; 1938 Cimenti 47 fameis tal Comun di Lauc. Tal 1444 honesta domina Menia quondam Warnerii de Çument de Ossays. Dell’Oste 1999 al classifiche chest Çument tra i toponims (in chest câs un microtoponim di Dasais a Prât di Cjargne ) e no tra i nons di persone.