Al ven dal non di persone sloven che al corispuint al talian Canciano e par antîc, par esempli tal 1313, si lu scriveve Chozian o Cocian (Corgnali, 1965-67, p. 134 e 141), tal 1414 chotian e cocian (la forme furlane, documentade par esempli tal 1422, e jere Chiançian). Tal Schedari Corgnali: 1289 Coçeano filio q. Buçacharin a Glemone; 1327 Cociano tabernario de Civitate; 1363 Choçian a Foran; 1365 Chozian de Purcilis a Atimis; 1374 Coçianus q. Quarini de Poglanis a Cividât; 1381 Chozeano q. Ropretti de Costalonga a Faedis; 1409 Jacobus fil. Cocianj (Chociano) de Alçida; 1409 Cotianus a Vernàs; 1450 de Chozian a Chiavoret; 1465 Cocianus de Prapoth; 1471 Cocian a Azide; 1511 Jeronimo Cocian (o Cocianus) a Purgesin; 1564 Cozeano q. Joh. Blasuti de Monteaperta; 1584 Cozeano q. Joh. Blasuti de Monteaperta. Al è presint a Gurize, Caprive, Cormons, Cividât. Viodi ancje Coceánig e Coceano.

Al ven de version slovene dal non di persone e dal sant Canciano o Canziano, cul sufìs -ič (scrit -ig). San Canzian al è un sant di Aquilee, e la devozion par lui si è slargjade ancje tes valadis dal Nadison. Une testemoneance di chest e je la gleseute intitulade a San Canzian, aromai darote, su la mont omonime che e je parsore di Mezane, Cueste e Vernassin. Nol è un câs che al sedi nassût propit culì il cognon Coceanig che al è difondût massime te Val di Savogne (1613 Blas Cocianiz di Costa; 1614 Culau Cocianiz de Vernaso di Sopra) (Zuanella, Pulfar, pagj. 297).