Al è un dai tancj derivâts di Nicolò, midiant dal furlan Culàu, cul sufìs -ìz (pronunzie -ìç) di probabil valôr diminutîf. Di Culàu a Colavìz si sta pôc e l'inseriment de -v- al è normâl (Culavón al è un sorenon di Cjavaç e Colovìt al è un sorenon di Bordan). Tal câs di Colavizza si à vût ancje un passaç tal feminin, duncje al podarès corispuindi al talian “Nicolina". No je di escludi la ipotesi che si sedi fat midiant dal sufìs tipic sloven -ič. Al è un cognon tipic di Trasaghis, ma si lu cjate ancje a Osôf (rivât di Trasaghis: 1622 Ioannes Colavizza de Trasaghis incola Barci; Lucia uxor Antonij Colavizza de Trasaghis incola Barci; 1627 Lucina filia di Giacomo Culavizza et di Zuanina habitanti nel Barco), a Cjavaç (rivât di Trasaghis ai prins dal Sietcent), a Glemone (forsit di Trasaghis; 6 fameis tal 1929) e a San Vît dal Tiliment. La prime atestazion a Trasaghis e je dal 1562: Antonius Culavize et Leonardus Michaelis, pro comunibus et villarum de Trasaghis et Braulins... Tes copiis des cjartis di nodâr che par zentilece mi à fat vê Decio Tomat si puedin viodi un pocjis des variazions di grafie che chest cognon al à vût tal timp: 1565 Petrus Culavizza q. Appollonii de Trasaghis; 1581 Antonio di legitimo matrimonio nato de Zuane Culaice; 1591 Giuliana Culaice; 1618 Joannes Culhavizza; Simeonis Culhavizza.

Forsit e je une forme ipercorete di Cola, che al ven dal non Nicola par aferesi. Pal CI 497 al pues vê contribuît il toponim Colla che in Italie al è une vore frecuent, che al ven dal apelatîf colla “cuel, pas, siele tra monts". Cognon venit (ma difondût ancje in altri regjons setentrionâls); al è presint a Gurize e a Udin. Tal Schedari Corgnali: 1543 m.° Colla a Pordenon; 1554 Ser Colla de Nardin de Borgo de S.ta Lucia a Udin; 1573 Antonio di Colla a Mortesins.

Come Collodèl (viodi). Presint a Pordenon e a Purcie (e a Susegana in provincie di Trevîs).

Cognon de zone di Vicence presint a Codroip. Al ven di un toponim che si è fat sul latin corulus / colurus “noglâr".

Si pronunzie Colaùto o Colaùtto. Di fat, al ven di Culàu, non di persone che al corispuint al talian Nicolò, cu la zonte dal sufìs diminutîf classic -ùt. Duncje, si trate di Colaùt, che si podarès tradusi par talian cun “Nicolino” e al corispuint al plui difondût Colautti. Te grafie Collauto e je une -l- di masse, ma chest al è une ipercorezion avonde frecuente: baste pensâ a Segalla, Brollo, Collavini, Collavizza, Gallizia, e vie indenant. Al è presint a San Michêl, Sisarûl, Puart, San Filip (San Michêl), Torse (Pucinie).

Al è un dai tancj derivâts di (Ni)colò, che culì al è te forme diminutive Colovìt o Colavìt che e je ancjemò vive in cualchi paîs par dî di personis o di fameis. Al pues stâi ancje che al vegni di doi nons tacâts, o sedi (Ni) cola e Vito. Duncje, chest cognon al è come Colavitto (viodi). Al è presint a San Zorç da la Richinvelde a a Fossalte. Tal 1819 Giacomo Gallizio di Antonio nato nel 1792 in Cesarolo, vedovo, villico, sposa Santa Collavito di Osualdo, vedova da S. Giorgio (A.P. Tisane).

Viodi Colavizza. Stant che al è un cognon di Trasaghis, culì o din une version par furlan, te variante di chel paisut de Pedemontane, daûr de grafie uficiâl de lenghe furlane. Al ven dal non di persona Culàu, che a era una forma scurtada di Niculàu e che al corispuint al talian Nicolò. Da pît a si è metût -ìz (al feminîl -ìzza) che al à il significât di rindi pui biela la peraula dulà che a si taca (in qualchi cjarta antiga a si cjata scrit Culaice). Di Culaizza a si sta pôc a passâ a Culavizza cuntuna -v- che a pea i doi tocs (tal stes mût a Cjavaç al è vignût fûr il soranon Culavón e a Bordan Colovìt). Las vocâi senza acent a si trasformin vulintîr e cussì al è deventât Colavizza (visaitsi che il dopli z a si lei c como ta peraula cena). Insoma se i volessin tradusi Collavizza par talian al vignarès fûr “Nicolina” o alc dal gjenar. Ma parcè Collavizza cun doi eles e no cuntun? Parcè che una volta a di chei che a scrivevin a ur plaseva radoplâ la ele (cussì a son vignûts fûr cognons como Collini, Collino, Collavini, Collauto che a vegnin simpri di Culàu). Intuna sentenza dal 1562 pa definizion dai confins fra la plêf di Osôf e i comuns di Dalés e Oncedas a erin presints Antonius Culavize et Leonardus Michaelis, pro comunibus et villarum de Trasaghis et Braulins... Tas cjartas dai nadârs a si taca a cjatâ chest cognon tal 1565 cun Petrus Culavizza q. Appollonii de Trasaghis e po tal 1581 cun Antonio di legitimo matrimonio nato de Zuane Culaice. Tal 1591 a si cjata una Giuliana Culaice. Intuna stima dal 1618 a si po lei su del Forno iuxta campum Simeonis Culahvizza ab occasu, iuxta Joannem Culahvizza... Par antîc las nassitas a si regjistravin a Vasinas e tal Libri dai batisims di Vasinas il prin Collavizza a si lu cjata tal 1581. Par cjatâ il prin Collavizza regjistrât a Trasagas a bisugna rivâ ai 19 di Avrîl dal 1709 (Libri dai muarts) conche rese l’anima al suo Signore Lucia moglie di Giacomo Culavizza d’anni 60. Tal 1733 cun Domeniga figlia di Pietro Collavizza a si cjata, vadì pa prima volta, scrit chest cognon cun doi eles. I Colavìzzas incjimò dal Sîscent a son emigrâts a Osôf. Tai libris da plêf di Osôf a si cjata dal 1622 un Joannes Colavizza de Trasaghis incola Barci e una Lucia uxor Antonij Colavizza de Trasaghis incola Barci; tal 1627 Lucina filia di Giacomo Culavizza et di Zuanina habitanti nel Barco. Ta prima metât dal Sîscent i Colavìzzas a son lâts a Cjavaç cun Apollonio Colavizza. Di sigûr ancja i Colavizza di Glamona (cuntuna ele!) a vegnin di Trasagas (1585 Jacobus filius Leonardus Colavice de Trasagis); di là da la Aga a ur àn dât i soranons di famea di Gubève e Sglìnghigne.

Colavìn al è un dai tancj derivâts dal non Nicola (par furlan Niculàu e, par aferesi, Culàu). Al è probabil che chest cognon al sedi propit un diminutîf di Culàu midiant di Culauìn. Cussì ancje Biasutti 1976: “al è evident che al sedi un cognon patrinimic, diminutîf di Culàu cu la u mudade in v, come che al risulte de pronunzie popolâr Culavìn”. Viodi ancje Colavizza. La grafie plui corete e sarès Colavìn, Colavini, Colavino. Tal Schedari Corgnali: 1433 Ser Colavino notario Sesto; 1482 Colavin a Madrîs di Feagne; 1486 Culavinus de Sancto Joh. Casarsie; 1654 Colavin, -no a Vençon. La forme Collavìn e je tipiche di San Zorç di Noiâr. Collavini si cjate a Bertiûl (1687 don Gio Maria Collavino q. Zuane), Rivignan, Prissinins (1633 don Antonio Collavino), Udin, Forgjarie (culì al ven di un Nicolò detto Colavino che al jere stât podestât dal paîs tal 1512 e che si riferìs a un Culàu di Maddalena nomenât tal protocol Savorgnan dal 1415 (Biasutti 1976). Collavino a San Denêl, Ruvigne, Spilimberc, Tumieç, Udin.