Al è probabil che al vegni di Cumùs, forme aferetiche di Jacumùs, che a sô volte al ven di Jàcum “Giacomo" par talian, cu la zonte dal sufìs -ùs (come in Colussi, Sabidussi, Venerùs, e vie indenant) salacor cuntun valôr cjarinatîf diminutîf. Se a Cumùs si zonte il sufìs cun valôr dispresatîf -àt si à Cumussàt e di chi si passe a Comessàt: par rivâ al talian “Comessatti", si sta pôc. Dut câs, e jere ancje la forme Iacomés (sufìs compagn che in Carlesso, Pivesso, Contessi, e vie indenant), come che si pues capî di un document dal 1338 che al dîs Iohanne filio olim Iacomessii de Civitate (Moro, 1991). Une derivazion di comès “corpet" nus somee mancul probabile. A Soclêf, tal 1290, si veve un Giacomo o Comussio e al somearès che une volte al fos ancje un Cumussatti che al podarès jessi il Comessatti di vuê, cu la variante Commessatti, presinte in cheste localitât.