Al è probabil che al vegni di Conte (viodi), plui il sufìs -és presint in aree venete e furlane. A Feagne al è documentât come non di persone tal 1344 cun Fucon q. Contes che al vent unam suam canipam positam in cortina sancti Jacobi (tal 1338 une Contessa filia olim Egideii de Faganea). A Glemone, dulà che chest cognon al è ben presint (1549 Leonardo fiolo d’Antonio Contes de Stalis; 22 fameis tal 1929), si cjate scrit Contisso intun document dal 1575 e culì al podarès tratâsi dal sufìs -ìs (come in Brunisso, Bertolissi, e vie indenant): segn di vicjariance tra i sufìs -és e -ìs? Si cjatilu ancje a Osôf (rivât ca di Glemone, ma za tal 1740 Gio Batta Contesso pubblico perito a Osoppo) e a Dignan. Tal 1800 Contes presint a Frate di Cjanive (Luchini, 1997).