Costa al è un tiermin gjeografic (par solit si vûl dî “cueste de mont”) e al è un toponim une vore frecuent. A Forgjarie al à dât il cognon Garlatti-Costa. Il cognon Costa si lu cjate a Pordenon, Puart, Daçan, Udin, Gurize.

Al è probabil che al vegni di un toponim (viodi Costa, Costalonga). Al è presint a Sacîl (plui difondût tal Venit, massime a Marostica). Tal 1819 Antonio Costacurta di Andrea, villico da S. Cassiano, domic. a Topaligo, sposa Antonia Zandonà detta Bragon di Sebastian di Sacile (A.P. Sacîl).

Al ven dal non di une localitât. Costa culì, si riferìs ae cueste de mont. Costalunga al podarès jessi un microtoponim, ma al è ancje il non di centris abitâts te provincie di Verone, Trevîs e Udin (comun di Faedis). La forme Costalonga si le cjate a Pordenon e a Sacîl; Costalunga a Pordenon e Udin (ducj i doi a son plui difondûts tal Venit). Par Rapelli 1995 Costalonga e Costalunga di Verone ju fâs derivâ de localitât di Costalunga, frazion di Monteforte d’Alpone (VR), che lì si clame Costalónga.

Dal non di persone Costantino che si doprave par vecjo; par esempli, tal Necrologium aquileiense (NA) si cjate Costantinus filius Lazari de Portis, Constantinus de Savorgnano, Constantinus filius Federici de Castilirio. Tal Schedari Corgnali: 1393 Cristoforus q. Ser Costantini de Castellerio Utini in burgo Sancte Lucie habitans; 1453 Nicolao Costantini pellipario a Mueç; 1938 Costantini 28 fameis a Trasaghis. A Glemone tal 1405 Item expendi quos dedi Stephano Constantini, qui conduxit lapides ad dictum opus ex monte Glimine, soldos XLII. A Darbe tal 1570 Costantinus del Cargnello. Cognon une vore difondût a Vignesie e forsit par chest motîf si diseve a Trasaghis che i Costantìns a végnin di Vignesia. Invezit, al è une vore probabil che il cognon Costantini furlan si sedi fat in maniere autonome: in plui che a Trasaghis si lu cjate a Tresesin, San Zuan dal Nadison, Manzan, Cividât (tal 1598 Casa Costantini), Dignan (1342 domino Constantino plebano Ygnani; 1370 Bertrando q. Ser Constantino de Ygnano) e frazions, Bertiûl, Merêt di Cjapitul (culì a son clamâts Manzignèl parcè che a son rivâts ca di Manzignel, in comun di Manzan, tal 1887), Osôf (di Trasaghis o di Buie), Gurize, Cuar di Rosacis, Lignan, Çopule, Palme, Premariâs, Tavagnà, Buie (tal 1686 al è documentât a Osôf Gioseffo figlio di ms. Giulio Costantino di Buja), Glemone (1612 Petrus Franciscus filius Johannis à Costantino; 1637 D.ni Bartholomei Constantinis de Cadubrio incola Glemona). Ai 3 di Avost dal 1663 “Giobatta Costantino di Dignano lasciò per voto da lui fatto, quando ebbe l’archibugiata nella grava del Tagliamento, alla Veneranda Chiesa di S. Pietro di Pieve, mezzo campo da lui acquistato..."" (Zoratti, 1973). Lis primis atestazions dai Costantini di Trasaghis a son in documents di nodâr che nus à mostrât cun zentilece Decio Tomat: 1591 Zuane di Costantin; 1618 Petrum Constantini; in loco dicto in Aronch iuxta Constantinus Nicolai Constantini. Ma o volarès sclarîus chest cognon di Trasaghis te variante di furlan di Trasaghis: Chest cognon al ven dal non di persona Costantìn. Tas cjartas dai nadârs a si cjata un Zuane di Costantin tal 1591 e intuna stima dal 1618 al è ripuartât un Petrum Constantini e a si po lei in loco dicto in Aronch iuxta Constantinus Nicolai Constantini. Tal libri dai muarts da plêf di Osôf a si cjata, tal 1622, Leonardus filius Petri Costantini de Trasaghis e Jacobus filius Ioannis de Costantino de Trasaghis. Tal libri dai matrimonis da stessa plêf a si cjata Costantinus filius Petri Costantini tal 1625 e tal libri dai batîsims Petrus filius Constantini di Pietro Constantino tal 1631. Tal Libri dai batîsims di Dalès a si cjata un Zuanne di Costantino tal 1677 e un Pietro di Costantin tal 1678. Ai 15 di Fevrâr dal 1700 a si son maridâts (Libri dai matrimonis di Vasìnas) Zuanne figlio del qm. Antonio di Colle et Catterina di Valentino di Costantino di Trasaghis nella Veneranda Chiesa di S. Margherita di Trasaghis... Doi agns dopo, ai 20 di Fevrâr, a si maridin Antonio figlio di Zuanne Cechino et Zuannina figlia di Antonio Costantino tutti e due di Trasaghis; a fâ di copari a jerin Domenico di Costantino e Giacomo di Costantino. Tai libris da glesia di Trasagas i Costantins a si cjatin la prima volta in ocasion da famosa disgrazia da barcja di Braulins: ai 28 di Mai dal 1708 a son muarts neâts Valentin Costantin d’anni 60 circa, Biasio di Costantino d’anni 20, Orsola di Costantino d’anni 10... Ator pal Friûl a si cjata il cognon Costantini in tancj paîs (Trasesin, Manzan, San Zuan, Cividât, Dignan, Merêt di Cjapitul, Cuar, Bertiûl e âtis), ma i pensìn ch’a no vetin nissun ce fâ cui Costantins di Trasagas. I nestis vecjos a disevin che “i Costantìns a vègnin di Venecia” e, in efiets, chê citât a è plena di Costantini ma, i sin convints che nancja chei a no vetin nissun ce fâ cui trasagans; al sarà stât un tentatîf di “nobilitânus” in cualchi mût. I Costantins di Osôf, invezit, a podaressin vê cualchi parentât cun nô (ma tal 1686, a Osôf, al è nassût Gioseffo figlio di ms. Giulio Costantino di Buja et di Madalena jug. habitantis in Osoppo)”. Pai Costantini Manzignèi di Merêt di Cjapitul si pues viodi la publicazion I Manzignei – Ricerca fotografica e storica della famiglia Costantini, Desinano, Palmanova, 2002, pp. 96.

Dal non di persone Costantino; culì al manten une forme leade al latin. Tipic di Damâr dulà che al è documentât tai regjistris parochiâi almancul dal prin Cinccent tes formis Constantino, Constantini, Constantinis, Costantinis (Moroldo, 1999). Tal 1938 Costantinis 6 fameis a Damâr (Corgnali).

Come Costantini (viodi). Si cjate a Manià, Darbe (1570 Costantinus del Cargnello), Monfalcon.

Dal stes non di persone talian. Tal Schedari Corgnali: Costante = Costanzo; 1426 Cristoful lu Costant a Brazan; 1332 donna Costancia (ancje Gòstança o Costança) a Aquilee; 1567 Francesco de la Costanza a Pordenon. Presint a Gurize.

Dongje Vernàs (comun di San Pieri dai Sclavons), su la rive de mont Mladiesiena, al è un paisut (altitudin 300 metris), che i ultins abitants lu àn dal dut bandonât dopo de seconde vuere mondiâl, e che fin a vuê al à mantignût il non par sloven Hlíeva (par talian, Clèvis). E je une localitât ben riparade dai aiars dal Nord e duncje adate pai pomârs. In origjin, chest puest al jere une planina di proprietât de int di Vernàs che a vevin costruît culì plui stalis pes bestiis. Di chest fat chi al ven il non dal puest, pal apont Hlíeve o Hlíeva “stalis”. Po dopo, a son vignudis a stabilîsi culì cualchi famee e la planina si è mudade intun centri abitât dulà che a son nassûts cognons tipics di chi e che dopo a son emigrâts jù te planure, massime a Vernàs. Tra chescj o ricuardìn il cognon Costaperària. La int che e jere a stâ chi e arlevave bestiis, e lavorave la tiere e in plui a vevin pomârs, massime piruçârs. Al è probabil che al sedi par chest motîf che i furlans a clamavin cheste localitât Cueste Peràrie, che tacantsi dongje e italianizât al da Costaperària “cleve di mont plene di piruçârs”. Il toponim Costaperària al è documentât sui libris di batisim di San Pieri dai Sclavons za ai prins dal 1600 e al è deventât subit un cognon: 1620 Gaspero di Questa peraria; 1642 filius Tomae di Costaperaria di Vernaso; 1698 filius Caspari Costaperaria de Costaperaria. Come che si pues notâ, il cognon origjinari, che al indicave une persone di Costaperaria, al à pierdude la preposizion di e si è identificât cul toponim. (Zuanella, Dom, 15, 1994).

Viodi Garlatti e Costa. Tipic cognon di Forgjarie. Par Biasutti 1976 i Garlatti-Costa a vegnin di un Girolamo q. Domenico Garlatti dit della Costa, muart a 56 agns tal 1734. Si lu cjate ancje a Udin.