Dongje Vernàs (comun di San Pieri dai Sclavons), su la rive de mont Mladiesiena, al è un paisut (altitudin 300 metris), che i ultins abitants lu àn dal dut bandonât dopo de seconde vuere mondiâl, e che fin a vuê al à mantignût il non par sloven Hlíeva (par talian, Clèvis). E je une localitât ben riparade dai aiars dal Nord e duncje adate pai pomârs. In origjin, chest puest al jere une planina di proprietât de int di Vernàs che a vevin costruît culì plui stalis pes bestiis. Di chest fat chi al ven il non dal puest, pal apont Hlíeve o Hlíeva “stalis”. Po dopo, a son vignudis a stabilîsi culì cualchi famee e la planina si è mudade intun centri abitât dulà che a son nassûts cognons tipics di chi e che dopo a son emigrâts jù te planure, massime a Vernàs. Tra chescj o ricuardìn il cognon Costaperària. La int che e jere a stâ chi e arlevave bestiis, e lavorave la tiere e in plui a vevin pomârs, massime piruçârs. Al è probabil che al sedi par chest motîf che i furlans a clamavin cheste localitât Cueste Peràrie, che tacantsi dongje e italianizât al da Costaperària “cleve di mont plene di piruçârs”. Il toponim Costaperària al è documentât sui libris di batisim di San Pieri dai Sclavons za ai prins dal 1600 e al è deventât subit un cognon: 1620 Gaspero di Questa peraria; 1642 filius Tomae di Costaperaria di Vernaso; 1698 filius Caspari Costaperaria de Costaperaria. Come che si pues notâ, il cognon origjinari, che al indicave une persone di Costaperaria, al à pierdude la preposizion di e si è identificât cul toponim. (Zuanella, Dom, 15, 1994).