Chest cognon, tipic di Nimis (1431 Nicolò q. Giacomo Cuciç, Pietro Cuzise, Pietro Cuzisç), al somee che al vedi une forme slovene, ma Merkù 1982 nol rive a spiegâlu cun cheste lenghe. Duncje, o proponìn la ipotesi che al puedi vignî dal furlan Cuz (si pues pensâ al cognon Cuzzi), forme aferetiche diMarcùz (diminutîf dal non di persone Marco che al à dât il cognon Marcuzzi) o di altris non di persone (par esempli, Jacùz di Jàcum “Giacomo"). Il sufìs -iz al pues jessi furlan, o pûr, e chest nu somearès plui probabil, al pues corispuindi al sloven -ič. Duncje, al podarès jessi un cognon ibrit, come tancj che a son vignûts fûr te zone dal confin linguistic tra furlans e slovens (ancje la pronunzie di vuê Cùciz e indicarès miôr cheste ipotesi par vie che il sufìs furlan -ìz al à l'acent, duncje se al fos chel si varès di pronunziâ Cucìz). Tal Schedari Corgnali: 1253 Cuçite (o Cuçinus, Cuçiç) a Cividât; 1291 medietas unius mansi siti in villa de Tulmino q. habet Thomasium dictus Cuçiç iure legalii feudi; 1310 Cuçigoy de Albana; 1347 q. Chucini a Tarcint; 1360 Cucij (o Cuçius) tabernarius de villa Manzani; 1363 Chucino q. Birtulisij de Nimis; 1426 Nicolai Chucis a Nimis; 1519 Joh. Antonii Cuciz a Nimis; 1937 Cucìz 11 fameis a Nimis.