Cognon di Trep di Cjargne. O ripuartìn ce che al scrîf don Tarcisio Puntel (Puntel 1998). Al è une vore dificil stabilî cun sigurece la origjin e il significât dal cognon Cusina. Chês che o disarai a son dome ipotesis mês che però no rivin a dâ un cuadri sigûr, ancje se si poin su documents. Intun document dal 1415 al è un ciert Enrico Choyzina e cualchi timp dopo si viôt che a Trep al à vivût ancje un ciert Giacomo Cusas. Ce àno in comun chestis dôs informazions? Il fat che a ripuartin, in documents scrits a pôc timp di distance, tiermins che si somein une vore tra di lôr e che a rimandin al nestri atuâl cognon “Cusina”. La mê ipotesi e je che Cusas o Coizina a fossin sorenons, o pûr che te fevelade locâl antighe a volessin dî alc che vuê no savìn plui. Dut câs o vin cualchi informazion sigure. Tal 1600 te zone di Paluce e di Trep a jerin une vore di imigrâts e tai Regjistris di nassite e di matrimoni dal lûc si cjate cun frecuence il sorenon Brixianus o Brixensis, che nô o podaressin capî come “un che al ven di Bressie”. Ma cemût mai tantis personis tal 1600 varessino vût di vignî di Bressie a lavorâ culì in Cjargne? Salacor a vignivin par lavorâ tes seis, tes malghis, tai boscs, ducj lavôrs che a jerin disponibii pal grant numar di cramârs che des nestris valadis a emigravin di là des monts. Cheste informazion sul apelatîf Brixianus e à vût par me un sens plui clâr e complet cuant che o ai cjatât fûr une note dal 1619 che e fevele di un ciert Joannis Cusine Brixiani nunc Siai degentis (al jere vedul di une cierte Lucia; tal at di muart de femine, jê e ven indicade come la femine di Giovanni Cusine Brixiani). Al è pussibil che il nestri Zuan, dal moment che Coizina e Cusas a jerin za doprâts chi di nô, al vedi cjapât il sorenon di Cusine, salacor parcè che al jere a stâ, o al lavorave li di un Cusas dal puest? No son documents che a provin chestis ipotesis e duncje a restin dome une biele teorie che però no je dal dut improbabile. Une robe e je però sigure: chest Giovanni Cusine al è il prin antenât di ducj i Cusina che vuê a son presints te valade. Stant che no mi someave tant pussibil che un numar cussì alt di personis al podès rivâ di Bressie fin tes nestris valadis, mi restave di sclarî cuale che e fos la divignince dal apelatîf brixianus. La mê ricercje mi à puartât a scuvierzi un document dulà che Brixianus al jere compagnât de specificazion de Tirolo. Di fat, intun at di matrimoni, o cjatìn une cierte Filippa quondam Bartolomei Cusini de Tirolo, nunc Paluciae. Alore o ai capît che si tratave di Bressanone / Brixen. Duncje, al è verisimil che i Cusina de nestre zone a vignedin dal Sudtirôl. Ancjemò une curiositât su chest Giovanni: tal 1619 al veve tant che sorenon di Mochine e ancjemò vuê, dopo trê secui, i Cusina a son clamâts Mocha o Mochine.

Cognon venit presint a Pordenon e a Lignan. Al ven di cusìn cu la zonte dal sufìs classic cognominâl venit -àto.