Al ven salacor di Hauser, che al è une vore comun te formazion dai cognons todescs, e al vûl dî “paron di cjase” in sens gjeneric (B. Cinausero, informazion personâl). Ricuardìn che H- si mude in C- tes lenghis neolatinis. Par Maurizio Puntin (informazion personâl), invezit, al vignarès dal todesc Holscher “cjaliâr”, o Holzer “taielens”, che no si rivarès plui a ricognossilu pal fat di jessi stât par plui secui framieç de lenghe slovene (lenizion di -l- che e da *Housar) e di chê furlane (Ho- iniziâl pronunziade prime Co- e dopo Ca-). In Etnici 2008, 38 si cjate che Causer al è etnic di Cauz, un borgut bandonât di Prepot. Tal 1475 un Causer de Glemona. Vuê chest cognon al è presint massime a Cividât, soredut te frazion di Puriessin (1527 Zuan Causer; 1580 Joannem Causerum; in loco di Causar; in dì di vuê il toponim via Borgo Causero) dulà che la -s- si le pronunzie sibilante sorde (Càusser); tal Sietcent al jere ancje a Gjian là che al à lassât toponims (Causar tal 1728 e la Càussera vuê). Al è presint ancje a Cuar di Rosacis, Premariâs, Torean, Muimans, Udin.