Probabil che al vegni di mâs che, par venit come par furlan, al voleve dî “braide, podê cun abitazion che si da di coltivâ a une famee di campagne" (NP). Nol è di escludi che al puedi vê contribuît ancje Mâs, forme aferetiche di Tomâs “Tommaso". Intal Schedari Corgnali: 1331 Stephano del Mas de Bagnarola; 1338 Rodolfo dicto Mas de Clusa; 1449 maistro Domenego de Mas a Udin; 1458 Cristoful Mas de Ramanzas; 1464 Blasiuttum Iuliani del Mas a Mortean; 1464 magn. Georgij cerdonis del Mas de Utino; 1500 m.° Zorz dal Maz a Udin. Tal 1736 Vidal dal Mas fittuale in Annone (ASU CRS 6). Cognon avonde ben rapresentât te Marcje e tal Belumat; inte aree che o vin studiât si lu cjate a Sacîl, Puart, Danon, Cjanive, Pordenon, Siest, Çopule, Lignan, Tarcint, Tresesin.