Cence lassâ fûr il non di persone Dàrio, o sin sigûrs che, te plui part dai câs (almancul chei origjinaris de nestre regjon) si varà di lei Da Rìo e al derivarà, duncje, di un microtoponim che al vûl dî “riu". Cheste ultime ipotesi si le scuen par sigûr cjapâ in considerazion pal cognon cjargnel (presint a Tumieç, Vile di Cjargne, Enemonç, Lauc cun 13 fameis tal 1938): tal 1433 al jere a stâ a Muine, vuê tal comun di Davâr, un tâl Antonio q. Nicolò dit di Riu (Gortani, 1898). Cence altri, al pues vê judât il piçul centri abitât di Riu, Rivo par talian, in comun di Paluce (1299 Romanuttus de Riu de Carnea). Viodi ancje Rugo e Da Rio. Si lu cjate ancje a Sacîl, Cjons, Roncjis di Monfalcon, Udin. I Dario di Branc a son origjinaris di Dartigne e a son imigrâts li tal 1848; sul imprin a jerin ricuardâts tant che Da Rio (Comuzzo, 1996).