Cognon di Vasinis tal comun di Trasaghis (1505 Leonardus Doii, 1553 Gregorio di Doi, Gregorio q. Leonardi Dal Doi de Villa Avasinis; 1562 Joannes del Doi). Lis motivazions di chest cognon no son claris (sorenon dât a une famee dulà che a jerin doi zimui? Sorenon dât a dôs personis che a stevin simpri insiemi?). Tant par fâ viodi ancjemò une volte cetant dificil che al è rivâ a scuvierzi la origjin vere di cognons e sorenons, o citìn il câs di Nô-doi, non di cjasade di Vasinis: dome dopo vê fat cetantis ricercjis un informadôr nus à dit che al derive de frase a nô doi che une cubie di li si scambiave ogni volte che e beveve une sgnapute, robe che no sucedeve di râr.