A prin viodi, al somee un diminutîf di Domeni cul sufìs solit -ut, ven a stâi Domenùt, che, cuntun pâr di mudaments vocalics, al pues deventâ cun facilitât Diminut. Par dî il vêr, a Cjasteons di Strade, tal 1538, al jere un Giovanni dell’Hominut. Duncje dell’Hominut (diminutîf di om) al è deventât Dominut e Diminut (Costantini, 1972). Atestazions plui tardis, ripuartadis plui indenant, a fasaressin pendâ pe prime ipotesi, o ben di (di) Minut, ipocoristic di Domeni. Cognon carateristic di Cjasteons di Strade.