Dal non di persone Domenico, probabil te sô version furlane Domeni, cu la zonte dal sufìs sloven -ič (scrit -ig). Il non Domenich al è atestât tal secul XIII a Fare (Biasutti, 1956). Cognon presint a Malborghet.

Diminutîf di Domenico in cualchi sô variante dialetâl. Par talian però al è ancje domenichino “om cerimoniôs, pecengul" (sec. XIX) e, pal passât, “servidôr cjapât a fit la ‘domenie’ di ciertis sioris par metisi in mostre" (DEI). Presint a Prissinins e a Blancjade (Palaçûl), chi al è ancje Domeneghini; al à une cierte difusion te zone di Bressie.