Dal non di persone furlan Domeni o, miôr, di une sô antighe, e ben documentade, variante Domenis (par esempli tal secul XII un Domenis di Priôle (Sudri) al paiave iiii libras casei et XV denarios al Cjapitul di Aquilee; Toni filg Domenis a Glemone tal 1380; un mestri domenis al faseve il pistor, ven a stâi il fornâr, a Cividât tal 1414 tal 1423 scrit Domeniss pistor; tal 1443 un domenis pitachul e un domenis de nudim a Vençon; tal 1450 ser Domenis camerar a Tresesin). La forme Domenis e podarès jessi une latinizazion notarîl (e je bondance di câs simii), ma no si à par nuie di scartâ une pronunzie antighe Domenìs (viodi Menis e Petris), come che si à in Bertolissi / Bertolìs, Brunisso / Brunìs, e v.i.: in chest câs e sarès une forme probabile di diminutîf cjarinatîf otignude cul sufîs -ìs. A sapontâ cheste ultime ipotesi a podaressin jessi formis antighis tant che Domenisi e Domenisio: 1293 Investitio Domenisi de Mançano; Domenisio de Mançano (Corgnali 1965-67, p. 138). Chest cognon al è tipic di Ruede (Pulfar) dulà che al è documentât dal principi dal Sîscent (1612 Matheu Domenisiz de Roda; 1615 Filippo Domenis de Roda). Di chi al è rivât jù tal fonts de val e po te zone di Cividât, dulà che al è pluitost difondût. Al è probabil che il cognon si sedi disvilupât te frazion di Domenis (Doméjža par sloven) che e à cjapât la denominazion dal cognon tipic dal lûc (Zuanella, Dom, 21, 1996). Intal Schedari Corgnali: 1272 Domenisio de Avasines; 1327 Domenisi de Alçida; 1381 Domenisus a Cividât.