Al podarès jessi interpretât tant che Duria, feminin di Durì, come che di Fidrì si à Fidria (sorenon di une famee De Simon a Osôf). Tal 1415 Niculau di Duria a Pinçan (Scatton, 1994). Si lu cjate a Codroip, Dartigne, Tresesin, Udin.

Probabile forme di dispresi di Durì. No si à di escludi, però, une derivazion di duriat, non di uciel avonde carateristic, cognossût ancje come coc ("occhione" par talian). Presint a Udin e a Pontêbe.

Il cognon Duriava / Durjava al jere slargjât tal 1600 a Tribil Disot (comun di Stregne) e in cualchi paîs de parochie di Prepot. Tra chestis dôs zonis confinantis a son simpri stâts contats umans che a àn favorît i matrimonis e la osmosi conseguente di cognons di une bande e di chê altre. Vuê chest cognon al è presint in diviersis localitâts des Vals dal Nadison e ancje te zone di Cividât dulà che al è emigrât dopo de seconde vuere mondiâl. Il cognon Duriava al è nassût, cu la formant -(j) ava, dal adietîf sloven dúr che al à plui di un significât: “timit, salvadi, biadin" (Zuanella, Dom, 7, 1989).

Il cognon sloven Duriavig / Durjávič al è un patronimic che al derive dret, cu la formant -ič, dal cognon Duriava (viodi). In dì di vuê, chest cognon al è slargjât massime tai comuns di San Lenart e di Stregne, ma nol è râr te zone di Cividât dulà che al è emigrât dopo de seconde vuere mondiâl (Zuanella, Dom, 7, 1989). Ma za tal 1598 a Cividât Antonio Duriavig.