Di fâri, non di mistîr. Lis formis italianizadis Fabro, Fabbro, Del Fabbro, e v.i. a son tant plui frecuentis. Se di origjin venite o podìn concuardâ cun Rapelli 1995: si tratarès di un cognon tipic di Mozzecane (VR) e al vignarès dal non di persone di origjin gjermaniche Faro. Presint a Mortean e a Monfalcon. Tal SL Ioannis Fabri (latin) e Zuan del Fari (furlan) si riferissin sigûr ae stesse persone. Tal 1776 Gian Domenico di Pietro q. Lorenzo q. Gian Domenico q. Stefano Fari da Palazzolo sposa Maria Gregorutti (Biasutti). Viodi ancje Fabbro, Fabro, Del Fabbro.

Non di mistîr une vore difondût in Italie. Tal 1426 In Grupignan. Driuz fiol di Denel Farino mulinar. Presint a Udin (1497 Nicolò Farina da Udine cavallaro). Tal 1402 Candido d.° Farina q. Misson da Segnacco (Biasutti). Intal Schedari Biasutti: 1317 Odorlicus dictus Fariner de Tricano; 1324 Farina de Alnyco; 1336 Viviano dicto Farinella a Puart; 1411 Candido dicto Farina de Caporiaco; 1540 Joannes Farina (o Farinacij) a Romans (Vildivar); 1573 Jacum Farinaz a Bean.

Diminutîf di farine e probabil non di mistîr. Si lu cjate a Pordenon: tal 1609 Ser Franc. de Maniago detto Farinella abit. in Pordenon, debitore Sigg. Popaite (ASU Popaite 7.3). Al è ancje cognon dal palermitan e dal ferarês.