Dal non di femine Flora. Carateristic di Runcjis (Fontanefrede) li che al è documentât almancul dal 1554 cun Vincenzo della Flora Ceolin. In origjin, duncje, al jere un matronimic de famee Ceolìn (Pes e Fadelli, 1993). Presint a Pordenon.

Al è clâr che al derive dal non di persone Floriano. Presint tal comun di Resie a Crisacis, Gnive e Liscjace (Merkù, 1981). Tal 1816 Mattia di Floriano di Giovanni nato nella Comune di Gniva nel 1774, villico, sposa Domenica di Battista di Stefano di Gniva (A.P. Resie). Tal 1938 Di Floriano 15 fameis a Gnive, 6 a Prât e 1 a San Zorç di Resie (Corgnali).

Di flôr “fiore", che al jere un non di persone, massime al feminin. Cognon di Pontêbe. Tal Schedari Corgnali: 1368 Flor filia Oliverij a Muimans; secul XIV donna Flor a Udin; 1407 Zuannuto q. Odorici de Magnano dicti Flor de Cort; 1523 Simone q. Joannis del Flor a Baracèt. Tal OT 88 Henricus olim Jacobi de Argis et Flor uxor praedicti.

Dal stes non di femine. Al è a Paluce, Udin, Pordenon, Sacîl. Tal Schedari Corgnali: 1382 Flora de Palaçolo; secul XIV Flora de Muscleto; secul XIV Dominica dicta Flora a Ravose; 1451 Dominicum de Flora a Pordenon; 1937 Flora 7 fameis a Enemonç; 1938 Flora 16 fameis a Paluce. Tal 1405 Domina Flore uxor Thome quondam Petri de Moiimaco (Ziani, 1999).

Flóram al è un dai cognons endemics di Pean, tal comun di Pulfar, e al à dât il non a un dai tancj siei borcs (Flórmi, che al è la forme plurâl di Flóram). Dai documents che o vin (1615 Antonio Furloram de Pegliano; 1617 Laurino Farlorum de Pegliano; 1623 Giesa Furlorma de Oflan; e vie indenant) al risulte che la forme origjinarie e sedi stade Furlóram o Forlóram tramudade dopo par aplosi in Flóram. Chest mudament si à vût sul principi dal Sietcent (filius Valentini Floram de Pegliano tal 1718), ancje se la forme antighe e je presinte, rare, tai Libris dai muarts fin ae metât di chel secul (filius Thomae Forloram de Azida tal 1750). Di Pean, dulà che al è ancjemò presint tal borc di Flormi, il cognon al è emigrât jù te val, a Prepot, Udin, Torean e tal comun di Faedis (Sofumberc, Faedis e Cjampei), dulà che al è presint massime te forme Floran. Al è di notâ che tal dialet sloven dal Nadison, lis finâls des peraulis in -am si à di pronunziâlis -an. Cussì si sclarìs ancje il passaç di Flóram a Flóran. Dal rest, cheste seconde forme e je regjistrade tai Libris dai muarts di San Pieri dal Sclavons za tal 1740 cun Marinus Floran de Peano. O pensi che al sedi un cognon che al ven di cualchi fonde lessicâl todescje che però no je facile di determinâ cun sigurece; dut câs, nol à nuie a ce fâ cu lis rosis, cu la floriculture o cul non di Sant Florean (Zuanella, Dom, 11, 1997).

Dal non di persone Florean (par talian, Floriano o Floreano). Tal 1397 a Muimans unum campum Jacobi filii Floriani (Ziani, 1999); tal 1425 a Udin Florgan (si à di leilu Floriàn) chaliar. Al è avonde difondût a Maian, Zomeais di Tarcint, Udin, San Denêl; si lu cjate ancje a Martignà, Rivis Darcjan (1550 Tulissio o Bertulissio q. Antonio Floreani da Giavons; a Gjavons tal 1584 i Floreani al jere un dai 7 borcs dal paîs), Vendoi di Trep Grant (1421 Nicolò f. di Floriano; Floriano q. Pietro Floreani), Passons di Pasian di Prât, Tresesin, Glemone (3 fameis tal 1929), Murùs, Cjassà, Tavagnà, Pordenon, Spilimberc. San Florean al protezeve cuintri dai fûcs e al jere contât ancje tra i sants protetôrs dai nemâi di cjase. Di un "grafit" te gleseute di Sant Florean di Polcenic, o savìn che tal Mai dal 1594 un ciert Francesco del Fatoral veve fate dî une messe pregando Iddio et S. Floriano par che me daja prosberità nel mio bestiam (A. Fadelli, La chiesa di San Floriano a San Giovanni di Polcenigo, Provincie di Pordenon, 1999, pagj. 88). A Sante Marie la Lungje e je une i>Braide di Floreàn (Moschion, 1999). San Floreàn al è un borc grant di Buie: "Di San Floreano qui ci si ricorda non solo il 4 maggio che è la sua festa, e non solo nella borgata omonima, ma in tutta Buja, specie da chi ha una stalla. Perché il santo, a differenza di altri paesi che lo tengono per protettore contro gl’incendi, qui lo venerano come protettore delle armente da latte. E se chiedete ad un bujese cos’ha il santo in quel secchio che tiene in mano vi dirà senza esitare: il latte!" (Cracina A., Zamparo V., Briciole di storia e di vita buiese, Chiandetti, Reana, 1982).

Diminutîf dal non di persone Floreàn “Floreano". Si lu cjate massime a Vile di Cjargne (Divilin); po dopo a Tresesin e a Udin.

Dal non di persone Floreàn “Floreano" (viodi ancje Floreani). Al è a San Denêl e a Pordenon.

Diminutîf dal non Floreàn “Floreano".

Cognon di Savogne dal Lusinç. O podìn dome pensâ che al sedi une forme grafiche falade di Floreanìn (viodi Floreanini).

Di Floretto o Floretta, nons di persone che a son variantis di Flora. Tal Schedari Corgnali: 1341 Floretus a Mueç; 1341 Floretus (o Floretti) de Travisigna; 1515 D. Floretta de Brazaco a Udin. Al è presint a Udin.

Dal non di persone Floreàn(o). Viôt ancje Floreani. Al è a Puart, San Martin (Davian), Pordenon, Travês, Cint.

Cognon sloven che al ven dal non di persone Florjàn “Floriano" cul sufìs -čič. Al è tipic dal paîs di Cosne (Costne/Hostne) tal comun di Grimà e di culì si è difondût tes Vals di Sant Lenart, a Cividât e te planure furlane (Zuanella, Dom, 22, 1987). La presince di chest cognon propit a Cosne si sclarìs cul fat che te gleseute locâl dal Cinccent di Sant Matie si venere ancje Sant Florian.

Dal non di persone Floriano. Il prin al è venit e trentin, il secont al è di Caserte e di Bari. Viodi Floreani, Floreano.

Cognon presint a San Florean (comun di Cjasarse), dulà che al è documentât dal 1575 (Luchini, 1995). Al pues vignî dal non di persone Flòrido (dal latin floridus “florît"), ma al podarès ancje jessi un tentatîf di italianizazion, o, miôr, di venetizazion dal non di persone Flurît: di fat, si cjate scrit ancje Floriti e Florito (e duncje al sarès di pronunziâlu Florìdo). Tes pergamenis de plêf di Dardâc (Perfetti e Goi, 1979) al è un Florido q. Davide tal 1368 e un Florido q. Francesco Forte tal 1416. A Barbean, comun di Spilimberc, dal Cinccent al Sietcent si cjatin sedi Fiorito, Florido che Fioritto (Spagnolo, 1994). Tal SL o vin Florida e Floridus de Malacinpicha. La forme feminine Florìda e je a Dilignidis di Soclêf. Tal Schedari Corgnali: 1301 Florido de Ragonia; 1331 nob. Floridus q. Guarienti de Flagonia (Corgnali); 1338 Fluridam uxorem a Manià; secul XIV Flurida uxor Danielis e jere a stâ a Udin; 1412 donna Floridia a San Vît; 1486 Florida uxor a Pordenon; 1525 Matheus Floride a Entrampo; 1667 Toffolo di Florida a Frisanc; 1938 Florida 11 fameis a Dilignidis di Soclêf.

Come Florido (viodi), cu la zonte dal sufìs diminutîf cjarinatîf -ùz. Presint a Cordenons e a Purcie.

Flôr al jere un non antîc di persone, masculin e feminin. Tal NA si cjatin Flor ava Maffei clerici e Flor de Cucanea. In SL Flor uxor Martini. Florìs si fâs cu la zonte di un sufìs che al à cun probabilitât une funzion diminutive cjarinative. Tal Schedari Corgnali: 1319 donna Florisa uxor d.no Widoli de Braçaco inf.; 1327 Domina Florisia olim D. Gneuli a Feagne; 1330 domibus magistri Floris de Utino; 1365 magn. Floris de Utino; secul XIV Flurisa filia Capit. de Castiluto; 1486 Nicolao Floris de Tramontio. Tal 1415 Marchuzo q. Fluris a Pinçan; tal 1494 D. Nicolaum D. Floris a Malisane (comun di Tor di Zuin). Tal stes secul a Navuacs di Cuar di Rosacis si à Nicolò Floris, clamât ancje Nicolò de Flore (Biasutti). Il cognon al è a Rodean Bas (tal Cuatricent Florisji de Rodegliano; tal 1583 Zuane Florisso) in comun di Rivis Darcjan e di San Denêl.

Dal non di persone Floriano te version venite. Cognon cuntune difusion discrete tes provinciis di Trevîs e Vignesie; te nestre regjon al è a Cordenons e a Pordenon.

Di Flôr, non di persone che si doprave par antîc cu la zonte dal sufìs -ìt cun valôr diminutîf. O pûr di Flurît, un altri non di persone cul significât biel di "florît". Tal 1434 Flurit tesedor a Udin; tal 1443 un march florit a Vençon; tal 1587 Giovanni Floriti di Coseano (Biasutti). Un Flurît di Tisane al jere poete tal Cinccent: Si tu vedès un pôc lu miò toglât quant ch’al è dut plen di fave e di linz tu vorès mièj a mi no cu a Tomât. Jo t’ài fat fazint a pueste un biel buinz dut lavorât di gasi dentri e fûr ch’jo t’al vuei dâ s’tu no mi dâs discuinz. O sassinazze................................ Il cognon Florìt al è a Dalegnidis di Lauc, Udin, Çarvignan, Tumieç, Monfalcon, Feagne (tal catapan cun Nicolò fu Florito al somee ancjemò il non di une persone; tal 1769 Biasio, Zuan e GioBatta Florit). Tal Schedari Corgnali: 1302 Florit de Pinçano; 1392 Fluritus sartor a Udin; 1446 campum Fluriti de putto de Sancto Daniele a Gjavons; 1499 Franc. Flurit a Lignidis. La tabele IGM dal 1916 e ripuarte Case Florit a Nordovest di Feagne, deventadis Casali Zoratti te version di vuê (Zucchiatti, 2000).

Dal stes non di persone, variante masculine dal plui comun Flora. Ae fortune di chest non e à contribuît la fame di romançs, poemis e cjants medievâi (rivâts fin ae ete moderne) su la storie romantiche di amôr tra i>Florio e Biancofiore; la font e je un poeme dal secul XI in francês antîc “Floire et Blanceflor "(De Felice, 1986). Al è a Davian e a Privan di Bagnarie (a Triest, e ca e là tal Venit).