Al è probabil che al sedi la italianizazion di Franz (viodi). Al è a Pordenon e a Prate (in plui, te provincie di Vignesie, massime a Jesolo).

Di Franz, forme curte di Francesco, cu la zonte di un pâr di sufìs diminutîfs. Al è massime a Udin e dopo a Pasian di Prât, Pagnà e a Pordenon.

Diminutîf di Franz, forme curte di Francesco. Tal Schedari Corgnali: 1359 Mattiusii olim Franzut de Beglano a Udin; secul XIV Françutus de Romans. Tal 1409 Pietro Franzutti cerdo q. Nicolò di Porta Villalta di Udine era priore dei Battuti (Biasutti).

Diminutîf di Franz (viodi). Al è a San Stin e a Feagne. Tal 1449 Lenart Franzin di Pantianins a Udin (Corgnali). Tal 1594 al è resident a Darzin Franzin di Natale Michelini rivât di Vacîl. Tra i toponims di Darzin al è lo campo che fu del Franzin à Nadal de Vacil tal 1594, la braida di Franzin di Valvasone tal 1655, il pradi detto la Franzina tal 1691, il prado detto di Franzina sive Rojat tal 1777 e il prado della Franzina ossia detto Frizza tal 1787 (Petris, 1999).

Cognon dal Trentin e massime di Vignesie e de sô provincie; in Friûl al è râr (Passons di Pasian di Prât, Codroip, Bicinins, Pordenon). Al è probabil che al vegni di Franz (viodi) ipocoristic di Francesco; la finâl -òi e podarès jessi il risultât venezian dal sufìs diminutîf -òli (CI 792). Simpri te zone di Vignesie al è il cognon Franzo. Tal 1528 Campum Joannis Franzoi de Reschiaco (Corgnali).

Incressitîf di Franz, che al è la forme curte di Francesco. Al è a Gurize, Gardiscje, Monfalcon, Sagrât, Cjamplunc, Çarvignan, Flumisel, Vilès, Turiac.

Incressitîf di Franz (viodi). Tal Schedari Corgnali: 1314 Françono sartore a Cividât; 1329 Franzono a Triest; 1426 Franzon a Siyà (Sià); 1513 Joanne Franzoni a Ontagnan; 1558 Toni Franzon di Chiopris. La forme Franzón e je a Codroip, Vildivar, San Vît dal Tiliment, Udin, Gruâr (Bagnare); Franzoni, al è avonde difondût te zone di Bressie e si lu cjate a Gurize. Une volte al jere presint a Migjee: 1560 Hieronymus de le Pelegrine Franzonus (FS).

Cognon di divignince gjermaniche che al è un diminutîf di Franz, che al è la forme curte di Franziskus “Francesco". Chest cognon al è presint a Dalès (comun di Trasaghis) dal Cinccent tes formis Franzili, Francili, Franchi, Franz, Francil, Franzil. Une des primis voltis che al è ripuartât suntun document al è chel de donazion fate di Gerolamo Rabassi ai nevôts Candido e Simone tal 1549, dulà che Jacobum Francili al è confinant di un prât Sot Cuel. Tal 1583 Giacomo Turisini al puarte in tribunâl cualchi paisan di Dalès par debits di definî: Joannem Franchi al è un di chei. Tal 1592 Giovanni Bertoli di Dalès al vent un cjamp te Tavella di Alesso in loco Baraz par vot ducâts a Joanni Francili dicti loci. Tal 1595 Giacomo Turisini, responsabil de robe dal muart Giovanni Turisini al clame a fânt la stime Apollonius Julianus, Joannis Marini e Joannis Franci Ducj di Dalès. In ats notarîi di chei agns al è cualchi Franzil a Montenârs; di chestis informazions chi o podìn pensâ che a sedin stadis a stâ a Montenârs dôs o trê fameis (1571 Leonardo Francil de Montenario, e vie indenant). Tal 1528 Antonio falzario q. Filippo Franzil di Segnacco (Biasutti). Tal 1516 Colussa q. Antonio Franzil da Tarcento; è zia di Francesco Franzil detto Ianzilut (Biasutti). Simpri tal Cinccent a Gaian (Archivi Capitolâr di Cividât) Frànzil al è ripuartât tant che sorenon. Te verifiche dai confins tra Dalès e Vasinis fate ai 2 di Avrîl dal 1660 te zone dal Leâl, in presince di Giulio Savorgnan par Vasinis e dal dotôr Bertucci di Tumieç par Dalès,Battista q. Giacomo Franzil e Gio:Daniel q. Pietro Franzil cun altre int di Dalès a son acusâts di vê disturbât il sorelûc. Battista Franzil, aes domandis che i veve fat il judiç al veve rispuindût: ero io con ventisei pecore, è capre, Zuan Daniel Franzil, et Antonio Rabasso con altre, che tutte summavano cento venticinque, et andassimo al pascolo su la gengia dell’Alveo del Leale di qua verso sol levado in sito stato goduto, da noi della villa d’Alesso... (Tomat D., Dalés un timp par vivi, n. 31, 1999).