Cognon di Grau che in aparence al nas di un sorenon di une famee Zuberti: ai 18.10.1594 Andrea Zuberti dit Frauzin al è santul a un batisim. Ducj i Frausìn di Grau a vegnin di doi fradis, Antonio e Andrea (nassûts tor il 1540) fîs di Giacomo, nassût tor il 1510.
Il cognon nol è facil di sclarî, ma, stant che al è un sorenon de famee Zuberti, o Zusberti, che si crôt che e vedi une antighe assendence todescje, i specialiscj a podaressin lâ in chê direzion. O zontìn che de metât dal 1600 fin ae prime vuere mondiâl il cognon al è scrit Fraussin e, ogni tant, Frauxin (Scaramuzza, 2001). Par Pinguentini 1971 al è un diminutîf dal non di persone Eufrasio.
Al è une vore frecuent a Mugle (atestât a Zaule ae fin dal 1600; par Scaramuzza 2001 al è probabil che al vegni di Grau); presint a Maran e a Monfalcon.